Albertus dei gratia Patauiensis Episcopus ad perpetuam rei memoriam. Quoniam nonnisi pacis tempore bene colitur pacis auctor, Expedit personas Ecclesiasticas precipue deo sub obseruantia regulari militantes tamquam a mundi huius fluctibus sequestratas ab omni decertationis strepitu conquiescere, quatenus precisis dissidiorum vepribus altissimo, cui se proprio etiam velle et nolle abdicato deuouerunt, in conscientiarum tranquillitate valeant quietius famulari. Dudum igitur inter Venerabiles Conuentus Canonicorum Regularium Monasterii in Reichersperig nostre dyocesis ex parte vna nec non Sanctimonialium ibidem ex altera super nonnullis possessionibus, quas Moniales heedem per Prepositum et Conuentum Canonicorum predictorum, qui tunc pro tempore fuerant, a pluribus citra temporibus ab earum Monasterio et Conuentu alienatas asserebant ac etiam super administratione prebende consuete eis multo tempore diminute seu subtracte coram nobis materia questionis suborta et diutius ventilata, Tandem adhibito peritorum consilio partes predictas de utriusque earum bona voluntate et consensu taliter duximus concordandas videlicet, quod Prepositus et Conuentus predicti absque debita sollempnitate juris nullas deinceps possessiones Conuentuum predictorum quouis modo alienare debearit vel presumant, specialiter autem bona alienandi seu distrahendi subsequenter annotata, que ad Monasterium huiusmodi monialium pertinere singulariter dinoscuntur, Videlicet mediam libram denariorum de duabus areis in Reychersperig, jtem mediam libram denariorum in winreding,jtem in Chegelso^ed vnam libram denariorum, jtem in Geroling mediam libram denariorum, jtem in Pu^echperig duodecim solidos denariorum, jtem in Gaulsgrub duas Hubas soluentes octo metretas tritici, Quadraginta metretas Siliginis et duos porcos, jtem in Tobel vnam curiam soluentem quatuor metretas ordei et viginti metretas siliginis, jtem in Refel vnam decimam valentem sexaginta metretas omnis annone, jtem in Munstewr, Praitenaych, in Munichperig de viginti duabus Hubis integram decimam, jtem in weintzurlperig quatuor jugera vinearum, jtem in werd duo jugera vinearum, jtem Pratum dictum Pfisterwis, jtem vnum pratum in Pfeffing, jtem in Hospitali vnam aream, Absque expresso consensu dominarum seu sanctimonialium predictarum et sigilli earum approbatione nullam habere debeat penitus facultatem. Prebendam vero cottidianam et annuam Prepositus vel quicunque gubernator antedicti Monasterii in Reichersperig pro tempore fuerit, dominabus predictis iuxta moderationem infrascriptam expedite et absque diminutione qualibet deinceps ministrabit videlicet singulis mensibus, quibus Esus carnium permittitur, vnam pernam valoris trium solidorum ad minus eis ministrabit. Per aduentum vero domini Cuilibet domine sex Casei, quorum quilibet ad minus sit estimationis duorum denariorum vsualium. Et per totam quadragesimam sex libras Olei vnicuique loco pernarum huiusmodi et nichilominus quauis die per totum anni circulum vnus denarius et panis conpetens cum sufficientia Olerum et vna mensura vini, que vsitato vocabulo ain seydel nuncupatur, eisdem prestabuntur, jtem quolibet anno vna metreta tritici et due ordei dueque auene ac viginti quatuor vlne panni linei vel sexaginta denarii pro eodem, Hyemales vero non nisi secundo anno vel quadraginta denarii pro eisdem Et in tertio anno vnum pellicium vel dimidium talentum denariorum pro eodem ac in quarto anno vnum mantellum seu epytagium foratum vel quinque solidi pro eodem ipsis deinceps donabuntur. Et vltra hec omnia decem vacce pro sustentatione earum in allodio Monasterii Reychersperig predicto ipsis debent pabulari. Verum quia non expedit ancillas christi cultu diuino relicto extraneis obsequiis occupari, Tres persone, due quidem feminei et vna masculini sexus eis apte pro ipsarum cottidiano sunt seruitio deputande, quibus de victualibus et debita laborum remuneratione per Prepositum et Conuentum sepedictos similiter erit prouidendum. Preterea quecunque ex deuotione fidelium specialiter Conuentui seu Monasterio ipsarum monialium inter uiuos seu causa mortis legata seu collata fuerint, illa in utilitatem earum sunt singulariter conuertenda. Ceteris omnibus in aliis utriusque parcium predictarum priuilegiis contentis in suo robore duraturis. Ceterum quia premissa omnia et singula partes sepedicte concorditer approbauerunt, Nos vtilitate utriusque Monasteriorum predictorum diligenter attenta ad deuotam ipsarum instantiam singula queque gratanter approbantes Ex auctoritate ordinaria ex certa scientia duximus confirmanda. In quorum omnium et singulorum testimonium nostrum et antedictorum Conuentuum sigilla presentibus sunt appensa. Actum et Datum Patauie Dominica quasi modo geniti Anno domini Millesimo ccc° Tricesimo primo.

Source Fulltext: OÖUB 6 (Wien 1972) Nr. 7, S. 7ff.