Wir Herman von Gotes gnaden Probst vnd der Conuent vber al ze Reychersperig veriehen offenleich an dem prief vnd tu^en chunt allen den, die in sehent, horent oder lesent, Daz wir dem Edeln herren hern Hawgen von Morspach vnd seinem Svn hern Hainreichen, den Got genad, haben verchawfft vnd geben vnsers aygens Guetez Sybenthalb phunt geltz, der gelegen ist ze Viehawsen auf dem Do^erff, Vnd habent auch vns die selben herren daz selb gu^et vnd Gult ze Viehawsen vnd vnserm Gotzhaws ledichlich her wider geben also, daz wi\er Ewichlich dar vmb alle jar begen schullen iren jar tag vnd alle ierr vervodern mit Vigilii vnd mit Messen andachtichlieh, als sittlich vnd gewo^endlich ist, zwier in dem jar. Dez Ersten hern Hawgens jar Tag, vnd schullen denne vnder vns taylen vnd geben an dem selben jar Tag . . dem Probst zweliff schilling Pazzawer phenning, Dem Conuent zwelliff schilling Pazzawr phenning vnd den Chloster frowen pey vns Sechzich pazzawr phenning, die auch dar vmb zwier in dem jar iern jar Tag schullen begen. Darnach an hern Hainreichs jar Tag, swenne der in dem jar ist, schullen wier recht die andern Gult vnd phenning vnder vns taylen vnd geben sam an dem Ersten jar Tag hern Hawgen, dem . . Probst zweliff Schilling phenning, dem Conuent zweliff Schilling vnd den frowen sechzich phenning. Taetten wir dez nicht, daz wir die vorgenanten jar Taeg also nicht begiengen, als vorgeschriben ist, vnd die Gu^elt vnd daz Guet also vnder vns vnd auch vnder frowen nicht taylten vnd gaeben vnd dar an sawmich waeren, So schullen die naechsten Erben der vorgenanten herren von Morspach, die si lazzent oder habent, vollen vnd gantzen gewalt haben, an alle ierrung sich ze vnderwinden dez ob genanten Geltz vnd Gult vnd Selgraet ze Viehawsen dez selben jarez vnd schullen die gult vnd die phenning alle geben hintz einem andern Chloster, swo si hin wellent, da man der obgenanten herren ier jar Teg vnd alle ierr vodern da von begee. Wer aber daz, daz ier Erben nicht enwaern vnd absturben, so schol der . . Pyscholf ze Pazzaw, swer die weil da ist, vollen gewalt vnd recht haben mit allen den punten, als die vorgenanten Erben dez selben jarez also beschaidenlich, daz wier sein fu°rwazz an den andern jaren, swenne wier begên vnd volenden die obgenanten jar Taeg vnd die Gult vnder vns geben vnd taillen, als obengeschriben stet, vngolten beleiben an vnserm gelt vnd gueten vnd vor den vorgeschriben Erben. Vnd daz daz also Ewichlich staet beleib, dar vber geben wir den prief ze vrchnnd mit vnsers Genedigen herren hern Albrechtz des Pischolf ze Passaw anhangunden jnsigel vnd auch mit vnsern anhangunden jnsigeln versigelten. Der prief ist geben ze Pazzaw, do von Christes Gepu^erd waren Ergangen Tawsent jar Drew Hundert jar in den zwain vnd Dreizzgisten jar an sand Gerdrawten Tag der heyligen frowen.

Source Fulltext: OÖUB 6 (Wien 1972) Nr. 49, S. 57f.