Ich Jans von Weytra Purger ze Chrems vnd ich Imin sein Hausvraw vnd alle vnser Erben verriechen mit disem Brief vnd tun chunt allen den, die in lesent oder horent lesen, Vmb den chrieg, den wier gehabt haben gen dem erbern Herren Probst Dietmaren vnd gen seinem gotshaus ze Reichersperg vmb fvnf vnd vierzk pfenning Purchrecht geltes wienner mvnz, gelegen auf dezselben gotshauses weingarten in der Neydow vnd auf dem Hof ze Chrems, di selbn gult haben wier dem gotshaus ze Reichersperg ledichleich verchauft vnd gegeben vmb berait pfenning, vnd ob sich der vorgenant Weingart hin wider schuttet (sic) oder nicht, so haben wier noch vnser Erben hinfûr euichleich an der vorgenanten gült weder von den weingarten noch von den Huf dhain recht, noch dhain vorderung mit dhainerlay ansprach nimmer mer. Wir sein auch der selben gult dez egenanten Gotshauses rechter schirmer vnd gewer fûr all ansprach, als Purchrechtes recht ist vnd gewonhait dez landez in Ostereich; welchen schaden iz doruber mit recht dez scherms nam, den lubn wier im ganczleich abzelegen mit vnsern treuen vnd schulln si daz habn auf vns vnd auf alle deu vnd wier haben. Vnd gebn wier dem Gotzhaus ze Reichersperg diser sache zu einem sichern vrcho^em disen Brief versigltn mit mein vorgenants Jansen Insigel. Der gegeben ist an sand Cholmanstag nach dreuczehen Hundert Jaren von Christi gepurd in dem sechs vnd vierczkistem Jar.

Source Fulltext: OÖUB 6 (Wien 1972) Nr. 556, S. 562f.