Ich Hainreich Tevffenpech vnd alle mein erben wir veriechen offenbar an disem brif vnd tvn chunt allen den, di in sechent oder horent lesen, das wir mit wol verdachten mu^et vnd zu den zeiten, do wir iz wol getv^on machten vnd mit gu^otleichem willen vnser besten vreunt rat aus der hant geben haben alle di ansprach vnd den vnbillen, den wir gehabt haben hintz dem ersamen wi^erdigen herren probst Dietmarn vnd hintz seinem capitel datz Reichersperg vnd hintz alle i^eren nachchomen der gemayn vberal doselben vmb daz gu^ot, daz vnser lieber herr her O^ertolf der Tevffenpech lazzen hat, dem Got genad. Vnd wir haben daz also auz der hant geben den ersamen wirdigen herren probst Wernhern von Ro^enshofen vnd dem erbern herrn herrn Hainreich pfarrer von Sand Giligen ze Passaw vnd dem Hainreich dem Perchaymer, purger ze Scherding vnd dem Herman dem Phistermaister, purger ze Chrems, die des schiedherrn zwischen vns paydenthalben gewesen sint von iren gnaden vnd auch von iren trewen, den haben wir iz ganz vnd gar ledichleichen geben, daz wir fu^erbaz nimmer mer chain ansprach noch chain chrieg schullen gehaben vmb daz vorgenant gv^ot, daz vnser egenanter herr herr Ortolf der Tevffenpech, dem Got genad, lazzen hat dem Gotzhaus ze Reichersperig oder waz noch von im seines gv^etz hinzu^o chomen mag, dez sagen wir dem vorgenanten vnsern genedigen herrn probst Dietmarn ze Reichersperg vnd sein capitel vnd alle ir nachchomen doselben ledig vnd frei für allev ansprach vnd für allen chrieg, swie daz genant ist, vnd daz lub wir in aller stet ze haben mit vnsern trewn. Wand wir zu den zeiten nicht aygens insigel heten, so haben wir gepeten di erbern laevt herrn Symon von Ibs, zv den zeiten Richter in Chrems vnd in Stayn, vnd herrn Hermann den Pfistermaister, purger ze Chrems, daz in di irev insigel an disen brief habent geleit in selben an schaden zu einem getzeug der sach. Der prif ist geben do man zalt von Kristes gepurt drewtzehen hundert jar vnd in dem naw/en vnd viertzkistem jar Lamberti.

Source Fulltext: OÖUB 7 (Wien 1876) Nr. 136, S. 135f.