Guet herrn Jansen witib von Morspach seligen vnd mein sun Janns vnd Wernhart veriehen offenbar an dem brief, das wir funftzik pfunt passawer pfenning gegeben haben dem gotzhaus ze Reichersberg vnd dem conuent daselben, das si und ir nachkomen darvmb ewikleich haben sullen einen ewigen jartag, das ist an dem andern freytag in dem advent des nachtes mit vigilj vnd des morgen mit einer selmezz gesungen mit dem chor vnd sol den herren dauon geuallen in die oblay ein pfunt pfenning vnd all wochen zwo mess in dem capitel ainew an dem eritag auf des heiligen Geistes alter vnd die ander auf dem pfintztag auf Vnsers Herrn Leichnam alter vnd sol davon geuallen den herren, der die mess spricht ye drey pfenning von der mess. Wer aber das sich das nicht verging, als verschriben ist oder versawmpt wurd, so haben wir vnd vnser nachkomen in vnd iren nachkomen zu zesprechen vnd darnach sullen si alles das volfu^ern, das versaumpt ist, is ir dann eehaft not, an geuer. Wern si daruber sawmig vnd nicht volfürten, als verschrieben ist, so haben wir gewalt in nider ze legen mit ir guetem willen all ir voderung auf irem dorff ze Mu^enichperg als lanng vntz daz alles das eruollt werd, das oben beschriben ist, vnd das in vnd vns also stet vnd vntzebrochen beleib, geben wir in disen brief vnder herrn Lienharts von Morspach vnd Heinreichs des Gransen insigel. Vnd ist das geschehen drewtzehen hundert jar darnach in dem funftzkisten jar an sant Johannstag ze Sunbentten.

Source Fulltext: OÖUB 7 (Wien 1876) Nr. 190, S. 191f.