Ich Gebolf der Seifridstorfaer vnd ich Jans der Pogenhofaer vnser hausfrawn vnd all vnser erben veriehen offenleich, — daz wir — haben gegeben den erbaerigen herren ze Reichersperg in ir oblay ein pfunt pfenning geltz pazzawaer pfenning auf vnserm guet ze Aichperig gelegen in Riedaer gericht daz vnsers vreis aigen ist vnd daz si vns anderswo auf dem guet ze Pirichaech widerchert habent also mit der beschaiden, daz in daz verschriben pfunt geltz iaerchleich an allen abganch auf sand Georitag geuallen vnd darauf beleiben sol. Ez waer dann daz wir in anderswo ein guet pfunt geltz zaigten oder an einer andern stat da si iz gern nement, so sol vns daz pfunt geltz auf vnserm vor verschriben guet ze Aichperig ledig sein. Waer auer daz wir di vbertewrung auf vnserm guet ze Aichperig versetzen oder verchauffen wolten vmb vnser notdurft, so schullen wir si di bei dem ersten an notten, di schullen wir in gern geben für ander lewt. War auer daz in ir pfunt geltz iaerch- leich nicht geuiell auf sand Georitag als vor verschriben stet, so habent si vollen gewalt darvmb ze pfenten auf dem gu^et als auf anderm irm vrbar. Vnd ob in das indert vnderstanden ward von vnsern wegen waz si des schoden nement, daz schullen si haben auf der vbertewrung auf vnserm guet ze Aichperg. Darv^eber ze vrchund gib ich vorgenanter Gebolf Seifridstorfaer vnd ich Jans Pogenhofaer fu^er vns fu^er vnser hausfrawn vnd fu^er all vnser erben den brief versigelt mit vnsern anhangunden insigeln. Daz geschehen ist — — drewtzehen hundert iar darnach in dem sehs vnd fu^emtzigistem iar an dem auffert tag.

Source Fulltext: OÖUB 7 (Wien 1876) Nr. 451, S. 455f.