Ich Chunrat Rugers sun auz dem Vtzental vnd ich Heinreich vnd Symon mein su^on wir veriehen offenbar an disem brief allen la^euten, daz wir haben gewaruen von dem erbergen herrn ze Reichersperig ein gut in dem Vtzental auf dem Puhel zu vnser drin leiben mit solicher peschaiden, daz wir iz zimern stiftleich vnd pauleich legen schullen vnd schol auch vnser einer hou^esleich vnd hableich daravf sitzen vnd schullen dauon dinen ain halbz pfunt pfenning pazzawer munzz vnd zwai huner auf sant Michelstag ze weinachten zwei chas. Wir schullen auch ir stifttaiding wesuchen mit zwain hunern vnd darnach an schaden darauz. — Si habent auch alle di recht hintz vns di si habent hintz andern irn gehausten holden an alain daz si vns den dinst nicht schullen ho^ehen der voruerschriben ist. — — Vnd daz daz also staet vnd vnzebrochen peleib, geben wir in disen brief versigelt vnder des erbern mannes Jacobs des Elreichinger insigel. — Der brief ist gegeben — — dreuzehen hundert iar darnach in dem siben vnd fumftzigisten iar an sand Bartholomeustag,

Source Fulltext: OÖUB 7 (Wien 1876) Nr. 516, S. 524