Ich Christein di Erweininn von Geleinsdorf vnd ich Seifrid ir sun ein priester vnd ich Jorig Erwein ir pruder, ich Steffan der Scherg ir swager vnd ich Thoman vnd Jorig Wisenter ir sün pey der prukk vnd ich Hainreich Rappolt ir swager vnd all vnser erben wir yeriehen offenleich — das der erwer herr herr Dietmar ze den zeiten probst ze Reichersperg vnd der conuent daselben sy mit vns vnd wir mit in gutleiclien veraint vnd bericht haben vmb den chrieg der zwischen vns gewesen ist vmb vier vnd viertzik jeuch weingarten vnd äkcher — ze Grueb an der Wolfsleuten vnd vmb zwai jeuch weingarten — auch — ze Grueb, des wir veriehen haben ze purchrecht vnd der probst vnd sein conuent für sein veruallens guet also beschaidenleichen, das der vorgenant herr vnd sein conuent an ainem tail vnd wir — an dem andern tail des kriegs — hinter vier erbar man gegangen sein — hinder den erbern ritter herrn Otten den Floyt vnd hinter herrn Heinreichen den Gweltlein ze den zeiten hofrichter ze Meissau vnd hinter Vlreichen den Schreiber von Pergaw vnd hinter Otten den Floyt von Malebarn, vnd haben das ze paiden seiten verhaissen — alles staet ze haben das die obgenanten schiedleut daruber gesprochen habent. Vnd welicher tail den êgenanten schied nicht behielt, der schol yedem schiedman zehn pfunt wienner pfenning geuallen sein vnd sol alle seine recht gar vnd gantz verloren haben. Nu habent die êgenanten schiedleut gesprochen, das vns der erwerig her der probst gegeben hat sechczehn pfunt wienner pfenning fu^er alle die ansprach vnd recht die wir hintz den vorgenanten weingärten vnd akchern gehabt haben. Si haben auch gesprochen, das wir vns annemen sullen — für Larenzen vnsern pruder vnd für Andren vnsers pruder sun vnd für all die erben die auf das vorgenant guet erbrechtz geliehen habent — vnd haben wir dafur ze emptewr gesetzt vnsern weingarten ze Kelleinstorf mit Wernharten des Tragawer hant vnsers amptmanns vnd zu den zeiten richter ze Kelleinstorf — — —. Daruber zu ainem vrchund — geben wir in den prief vnder der erber leut anhangunden insigel versigelt — die der vorgenanten sach schiedleut vnd taidinger gewesen sind. — Das ist geschehen — drewtzehenhundert jar vnd in dem acht vnd funftzkisten jar an sand Cholmanstag.

Source Fulltext: OÖUB 7 (Wien 1876) Nr. 585, S. 597f.