Gotfridus dei gracia Patauiensis episcopus venerabili in Christo preposito monasterii in Reichersperg ordinis sancti Augustini canonicorum regularium nostre dyoecesis salutem in domino. Quia ad sustinenda diuersa gwerrarum et aliarum molestiarum incommoda, quibus nos et ecclesia nostra Patauiensis hactenus afflicti fuimus et adhuc multum affligimur onerose, necnon ad supportandas proui siones legatorum seu nunciorum sedis apostolice que se extendunt ad vnam satis reputabilem quantitatem, nostre non suppetunt facultates, et debita que propter premissa contraximus, absque subditorum nostrorum suffragio extinguere non valemus, ad postulandum a te et aliis nostris subditis subsidium nos vrget causa racionabilis et necessitas manifesta. Deuocionem itaque tuam monemus requirimus et hortamur in domino, quatenus quatuor marcas argenti quas a te nomine karitatiui subsidii nec non nostre prouisionis legatorum et nunciorum sedis apostolice nomine postulamus, infra hinc et festum sancti Michahelis proxime venturum archidiacono loci in quo constitutvs existis soluas nostro nomine integre et assignes teque in hiis soluendis sic exhibeas voluntarium et paratum, vt exinde tue circa nos feruor resplendeat karitatis nosque tibi astringamur efficacius ad vicissitudinem graciarum. Et si forte quod absit postulacionem nostram iustam et racionabilem transiueris aure surda et predictum soluere non curaueris subsidium in termino constituto, ex tunc auctoritate qua fungimur in hac parte te ab ingressu ecclesie suspendimus in hiis scriptis ad alias penas grauiores iuxta tue exigenciam contumacie efficacius nichilominus processuri. Datum Wienne Sixti pape anno domini millesimo trecentesimo sexagesimo.

Source Fulltext: OÖUB 7 (Wien 1876) Nr. 702, S. 706