Ich Tezzeres der Fraunhovaer vergich, daz ich mich gontz und gar bericht und betaydingt han mit dem ewirdigen gotzhaus von Reychersperg umb allev dev ansprach und chrieg di ich hintz dem obenanten gotzhaus gehobt han von dez werdes wegen alzo mit der beschaiden, daz der obenant werd beleiben sol ewichleich pey dem gotzhaus, ez tail oder schaid das wazzer hin oder her, und sol auch ich noch mein erben noch mein pruder Hans noch meins prueder chind her Nolido dez Fraunhovaer dem Got gnad noch all unser erben noch niemant von unsern wegen hintz dem obenanten gotzhaus noch hintz dhain der iren nimmer mer nichtz ze sprechen haben weder mit recht noch an recht noch mit gewalt von dez obenanten werdes wegen, und mag der probst und daz conventt von dez gotzhaus wegen iren frum damit schaffen handeln und tuen alz mit ander ir freyaer hab, und sullen wir si noch unser nachomen nichtz daran engen noch irren mit dhainerlay irrung wie di gnant moecht gesein. Auch verichen wir mer, waz daz wazzer geit oder nimt von ander unser paider gruentt wegen, da sol ez an all chrieg und widerred pey beleiben nach dez landez recht und gewonhait, und waz wir oder unser erben und nachchomen darumb mit in chriegen oder rechten wolten, daz sol daz obenant gotzhaus alz behabt haben und wir verlorn, und suellen wir da nichtz geniezzen und di herschafft darinn nichtz beschueten. Und daz daz dem obenanten gotzhaus alles staet und unzebrochen beleib geben wir den brief mit mein und meins pruder hern Hansen dez Fraunhovaer anhangunden insigeln, und ze einer pessern sicherhait under der erbern hern Hansen von Abensperch und hern Goergen von Ahaym insigeln di der sach taydinger gewesen sind und di di zue den unsern gehangen habent. Daz geschach an sand Thomanstag do man zalt von Christes gepu^erd dreutzehen hundert jar und darnach in dem fu^emff und segtzgistem jar.

Source Fulltext: OÖUB 8 (Wien 1883) Nr. 254, S. 254f.