Ich Chunrat von Law Ortolfs sun von Law der emaln chastner ze Obernperg gewesen ist vergich, daz ich mich frewntleich und liepleich bericht han mit dem erbern herrn hern Dietmarn probst ze Reichersperg und mit dem gotzhaus daselb umb di ansprach di ich gein dem vor genanten herrn und dem gotzhaus da selben von dez hofs wegen ze Law und dez zehent da selben gehabt han und auch umb allerlay handlung di wir mit ein ander ze schaffen gehabt haben uentzt auf den heutigen tag. Und zu urchund gib ich in vor genanter Chunrat von Law den prief versigelten mit meins genaedigen herrn hern Joerigens von Ahaim ze den zeiten pfleger ze Purchausen und mit dez vesten ritter hern Tomanns dez Apfentaler ze den zeiten pfleger ze Obernperg anhangenden insigeln, darunder ich mich verpint mit meinen trewn wann ich selb aygens insigel nicht enhan. Geben nach Christes gepurd dreutzehenhundert jar darnach in dem sibentzkisten jar an der aindlef tausend maidtag.

Source Fulltext: OÖUB 8 (Wien 1883) Nr. 495, S. 491