Ich Elspet Ulreichs dez Zehentner hausfrow und all mein erben wir verichen und tuen chund, daz wir recht und redleich verchauft haben mit dez gruntheren hant herrn Hainreichs die zeit gewaltig von dez covents wegen unser hofstat gelegen ze Pramperch da weilent auf gesessen ist Neithart in dem nidem dorf ze nagst dez Merchatz hofstat. Von der egenanten hofstat man jerleich dinet dreisick phennig und zwaintzig air und ain choes fuer ain phennig ze gruntrecht und nicht mer, und ist auch unverkumbert vor aller ander geltschuld gen cristen und gen juden. Di vorgenant hofstat haben wir verchauft mit allen den nuetzen und rechten als . . . . . . . selb hofstat unversprochenleich in nuetz und in gewer her pracht haben umb fuenf phunt wienner phennig der wir gar und gantz gerich . . . . . . . . . . t sein dem erbern mann Ulreichen dem Zehentner und sein erben furbas ze haben und allen iren frum damit ze schaffen ver . . . . ledichleich und freileich ze schaffen, geben und mochen wem sew wellend an allen chrieg und an alle yrrung und auch durich . . . . . sicherhait, so setz ich mich vorgenante Elspet Ulreichs dez Zehentner hausvrow und all mein erben dem egenanten Ulreichen dem Zehent . . . . und sein erben uber di vorgenant hofstat ze rechten scherm und geweren gentzleich fuer all ansprach als purchrechts recht ist nach der gevaer landrecht und gwonhait ze Osterreich und ze Steyr. Get in furbas daran icht ab oder ob sew mit recht icht chrieg ansprach irrung oder wechumbernus daran gewunen, von wem daz wer waz sew daran scheden nement den ir ains pey seinen trewn gesprechen mag ungesworen und an alle ander bewerung, denselben schaden schullen wir in abtragen. Und daz der chauf und die wandlung furbas also stet und unzebrochen peleib, dar uber so geben wir in den prief zu ainer waren sichtigen urchund der sach versigelten mit dez egenanten gruntherrn insigel her Hainreichs die zeit pharer ze Pramperch und mit dez erbern herrn gerren Ulreichs insigel die zeit pharer ze Chrumpach. Wan ich obgenante Elspet und mein erben aygens insigel nicht enhaben, so verpind ich mich mit all mein erben under die obgenanten zway insigel alles daz stet haben und ze volfueren daz oben an dem brief geschriben stet. der geben ist nach Christes gepürd drewtzehenhundert jar darnach in dem vir und sibitzkisten jare dez nagsten suntag nach den phingsten.

Source Fulltext: OÖUB 8 (Wien 1883) Nr. 690, S. 700f.