Ich Hainreich Gebhartz snn an dem Aygen mein hausfraw und unser paider sun Chanrat verichen, daz uns der erberig herr her Dietmar probst ze Reichersperg und der convent da selbs habent lassen ir guet ze Proezapfen also zu unser dreyer leib und lebtaegen und nicht lenger, mit allen den ern rechten und nuetzen di dar zue gehoernt oder da von bechoemen muegen, und schuellen in davon jaerleichen dienen und raihen auf sand Jacobs tag unverzogenleich ain halbs pfunt pfennig wienner muenzz und ze weinachten zwen chaes ze ostern zwen chaes und ze pfingsten zwen chaes daz yeder chaes wol vier pfennig wert sey, und schuellen in ir stiftaiding choemen mit zwelif pfennig und mit zwain huenern und an schaden dar auz. Taeten wir dez nicht daz wir daz minst oder daz maist nicht raiheten oder vol entaeten als oben auf di vor genanten taeg verschriben stet, so habent sich all unserew recht in und dem gotzhaws hin wider in ir gewalt vervallen und muegen si fuerbaz irs gotzhaus frum da mit geschaffen alz mit ander irs gotzhaus hab. Waer aber daz wir unsrew recht auf dem vor genanten guet versettzen oder verchauffen muesten oder wolten, di schuellen wir sew dez ersten an pieten und noetten und wolten si di selb dann von uns chauffen, di schuellen wir in als redleich und alz recht ze chauffen geben als andern laeuten. Wolten si aber der nicht von uns chauffen, so muegen wir unserew recht versettzen oder verchauffen umb unser notdurft und doch nuer einem geleichen rechten pawmann von dem si irer vodrung alz leicht muegen bechoemen alz von uns selben. Daz in daz also staet und unzebrochen beleib, geben wir ich vor genanter Hainreich mein hausfraw Dyetmuet und unser paider sun Chunrat in den prief versigelten mit dez erbern mann Herrn ans von Holtz anhangendem insigel. Der geben ist nach Christes gepürd dreutzehenhundert jar darnach in dem vier und sibentzkisten jar an sand Thomastag des heiligen zwelifpoten.

Source Fulltext: OÖUB 8 (Wien 1883) Nr. 716, S. 730f.