Nos Johannes Dei gracia Pataviensis et Fridricus monasterii sancti Nicolai extra muros Patavie ordinis sancti Augustini canonicorum regularium prepositi tenore presencium confitemur, quod cum inter religiosos viros in Christo nobis dilectos dominum Dyetmarum prepositum et conventum monasterii in Reichersperig dicti ordinis ex una et conventum sanctimonialium ibidem parte ex altera gravis esset materia questionis et dissensionis exhorta super provisione et administracione prebende eisdem sanctimonialibus facienda et aliis juribus et consuetudinibus observandis, et cum ipsi ex utraque parte hujusmodi questionis et dissensionis materiam ad aures reverendi in Christo patris et domini nostri domini Alberti episcopi Pataviensis sepius deduxissent instancius petentes, ut ipse eis sua graciosa diffinicione de et super premissis dignaretur salubrius providere, ipse dominus episcopus suis et ecclesie sue diversis et arduis negociis prepeditus super questione et dissensione hujusmodi diffiniendis nobis sub certis litteris plenarie conmisit vices suas. Nos itaque nolentes resistere ipsius mandatis sed pocius in omnibus obedire, volentes sicut tenemur prefatos Dyetmarum prepositum, conventum et sancti¬moniales antedictas cum omnibus suis litteris et munimentis quibus pro utraque parte uti vellent ad nostram vocavimus presenciam ad procedendum in facto prenotato. Comparentibus siquidem coram nobis partibus eisdem et productis per ipsas sanctimoniales quibusdam litteris super administracione prebende ac provisionibus et juribus eorum confectis auditisque amborum parcium proposicionibus, cum sic discordarent super premissis et diucius coram nobis concertarent, demum tamen ambe partes pro bono pacis et concordie et ut utrobique Deo quiecius possent deservire, in nos Johannem et Fridricum prepositos tanquam arbitratores et amicabiles conpositores de et super provisione et administracione prebende supradicte et aliis juribus et consuetudinibus earum ordinandis diffiniendis et limitandis sponte et liberaliter conpromiserunt promittentes fide data sub debito juramenti, quod omnia et singula que nos arbitrando diffiniendo et limitando super premissis pronunciaverimus, rata grata atque firma inviolabiliter vellent observare prout ex litteris eorum sigillis roboratis clarius apparet, ideoque nos Johannes et Fridricus supradicti diligenter inspectis et cognitis litteris et consideratis suppetentia et facultate dicti monasterii primo et principaliter vice et auctoritate domini nostri episcopi antedicti de consensu et voluntate dictarum parcium arbitramur ordinamus diffinimus et limitando pronunciamus, quod omnis lis accio questio et controversia inter prepositum conventum et sanctimoniales predictas occasione premissorum hactenus habita penitus sit sopita nec ab aliquo eorum ullis umquam temporibus repetenda, quodque fraternalem caritatem sibi mutuo de cetero debeant habere parte ex utraque. Item arbitrando diffinimus, ut ipse sanctimoniales preposito in Reichersperig faciant debitam reverentiam et obedientiam promittant et quod in antea uniant sub regulari disciplina, prout ipsorum docet regula et quod sint recluse in monasterio et claves monasterii prepositus in Reichersperig aut conventus si monasterium vacaverit, conmittat alicui ex contratribus suis ad hoc apto custodiendas, et quod dicte sanctimoniales extra septa sui monasterii preter licentiam prepositi vel ejus locum tenentis in hac parte de cetero exire et divagari non presumant nec aliquas querimonias ex quibus dicto monasterio in Reichersperig incomoda aliqua possent suboriri ad extraneas personas laicales per se vel interpositas personas occasione quacunque ulatenus deferant nec deferri procurant, nisi ad episcopum Pataviensem vel loci archidyaconum per ipsum episcopum deputatum. Alioquin predicte et infrascripte nostre ordinacionis et limitacionis contemptrices penam carceris volumus et ordinamus sustinere ad arbitrium ipsius prepositi tantummodo relaxandam. Item ordinamus quod dicte sanctimoniales singulis diebus legant horas canonicas in monasterio suo, donec earum numerus adeo accrescat quod ipsas horas possint per notam decantare sicut in aliis monasteriis fieri consuevit. Item prepositus predictus ordinet et mandet per suos fratres in monasterio sanctimonialium unam missam celebrari cottidie vel per notam decantari ac alia dedicacionum patrociniorum processionum anniversariorum officia diurna atque nocturna et solempnitates alias peregi laudabiles et consuetas. Item ne littere ipsarum sanctimonalium de cetero per eas vel aliquam earum distrahantur vel alienentur et ne per sigillum earum alique fiant innovaciones ordinamus, ut omnes earum littere munimenta ac sigillum in anteo semper deponantur et remaneant in monasterio sancti Nicolai Patavie per prepositum et conventum ibidem diligencius conservande. Quociens autem prepositus conventus seu sanctimoniales in Reichersperig predicti copias ipsarum litterarum pecierint, illas eis sub eorum tamen expensis nolumus denegari. Insuper dicte sanctimoniales predicto eorum sigillo nullatenus utantur in aliquo facto vel tractatu preter consensum prepositi et conventus predictorum, aliter littere ipso sigillo consignate omni penitus volumus carere firmitate. Item de prebenda cottidiana et annuali ipsis dominabus ministranda taliter ordinamus, quod prepositus monasterii in Reichersperig seu quicunque ad hoc deputatus singulis annis in festo nativitatis domini cuilibet sorori sive plures numero fuerint vel pauciores det et administret sine diminucione et dilacione dimidiam bernam vel sexaginta denarios usualis monete, item pro tempore quadragesimali in die cinerum cuilibet sorori sex libras olei olivarum vel quadraginta duos denarios, item cuilibet sorori cottidie ministret unum denarium et conpetens ac consuetus panis (sic) cum sufficiencia olerum et unam mensuram vini que seidel vulgariter nuncupatur, item quolibet anno in die nativitatis beate Marie virginis cuilibet sorori administret unam metretam tritici duas metretas ordei et duas metretas avene, item cuilibet sorori singulis annis per adventum Domini sex caseos vel duodecim denarios, item det et administret quolibet anno in die sancti Georii cuilibet sorori vinginti quatuor ulnas panni linei vel sexaginta denarios et pro calceis estivalibus quatuordecim denarios, item in secundo anno circa festum beati Martini cuilibet sorori pro calceis hiemalibus quadraginta denarios, item in tercio anno circa festum beati Martini cuilibet sorori unum pellicium vel medium talentum denariorum, item in quarto anno circa festum omnium sanctorum cuilibet unum pallium seu epitogium furratum cum panno lineo aut quinque solidos denariorum. Item prepo¬situs predictus nutriri faciat et continue pabulari pro duabus sororibus unam vaccam in allodio suo ibidem vicino, item pro conmuni servicio ipsarum sanctimonialium provideat duabus personis utriusque sexus in victualibus et mercede laboris, item provideat eisdem sanctimonialibus sufficienter de lignis pro coquina conmuni et calefaciat singulis annis refectorium et necessitate exigente infirmariam a festo omnium sanctorum usque in diem sancti Georii, item prepositus edifficet et reparet eis conmunia edificia pro dormitorio refectorio infirmaria et coquina necessaria prout in aliis monasteriis decenter fieri consuevit. Item ordinamus et limitamus, quod de omnibus rebus mobilibus donandis aut testandis monasterio sanctimonialium ipse sorores ad votum suum et utilitatem propriam debeant inter se disponere et equaliter ordinare, de rebus vero immobilibus eidem monasterio testandis vel donandis prepositus disponat et ordinet sicut de aliis bonis monasterii sui supradicti. Item volumus, quod non obstante ordinacione nostra predicta prebenda et alie administraciones ac provisiones ipsarum sanctimonialium secundum ubertatem et defectum fructuum et reddituum monasterii in Reichersperig augeri debent et diminui, prout in litteris felicis memorie domini Alberti episcopi Pataviensis clarius dinoscitur expressum. Cum autem arbitrio nostro stetur nisi metu pene volumus et ordinamus, si prepo¬situs vel conventus vacante monasterio vel alter ad hoc deputatus omnia et singula prout premittitur per nos arbitrata ordinata et limitata non adimpleret et ipsis sanctimonialibus non administraret vel similando ministrare diferret et monitus neglecta non emendaret, ex tunc episcopus vel loci archidyaconus qui pro tempore fuerit de bonis monasterii in Reichersperig omnia obmissa et retenta dictis dominabus administrabit et administrare faciet cum integritate, et prepositus seu conventus aut alter in boc negligens et remissus penis subjacebit per ipsum episcopum seu archidyaconum moderandis. In quorum omnium et singulorum testimonium presentes damus litteras sigillorum nostrorum appensione roboratas, Datum et actum Patavie anno nativitatis domini millesimo trecentesimo septuagesimo quarto die prima mensis Novembris.

Source Fulltext: OÖUB 8 (Wien 1883) Nr. 711, S. 721ff.