Ich Leuppolt der Tvmayer zu den zeitten probst vor der Inprukk ze Pazzaw vnd mein hausfraw Ann vergechen Offenbar mit dem brief allen läüten, daz vns der erberig Herr Her Dietmar probst ze Reichersperg vnd der conuent da selbs lazzen irew guet ze rechtem Leibgedi^eng zway zu amelreiching vnd ains ze Lindenperg gelegen in Schärdinger gericht, di Emalen von in Jacob der Grueber pürger ze Pazzaw von irm gotzhaus ze Leibgeding inn gehabt hat, da von er mit gu^etleichm willen gestanden ist, vnd sew dem gotzhaus aufgeben hat mit den vrchünden di er dar über het, allso mit der weschaiden, daz wir in da von järleich dienen vnd geben schüllen an sand Michelstag zwen vnd sibentzkig pfenig wienner münzz. Täten wir dez nicht, so habent si vollen gewalt auf den vorgenanten güten dar vmb ze pfenten. Wurd aber in pfantung gewert oder verstannden in dhainner weis, so haben wir all vnsrew recht verloren vnd mügen si dar nach mit vnserm gu^etleichen willen an all widerred mit den obgenanten gu^oten allen iren from schaffen tvn als mit ander irs Gotzhaus lediger hab. Wir schüllen auch vnserew recht weder versetzen noch verchauffen, nür mit irem gütleichen willen vnd gunst. Vnd wann vnser paider leyb nicht mer sind, vnd ab gent, so sind in vnd irem gotzhaus di offt genanten gu^et Ledig worden, alz man sew dann vindet ze haus, ze hof, ze holtz, ze veld an widerred aller läüt . vnd daz in daz allso stät, gantz vnd vnzebrochen beleyb, gib ich in vorgenanter Leujpolt der Tvmayer vnd mein hausfraw Ann den brief versigelten mit meinem anhangundem insigel vnd dar zue auch mit dez Erbern mannez Jacobs dez Grueber pürger ze Pazzaw anhangundem insigel versigelt der sein Jnsigel durch vnser vleizzigen gepet willen zu einer pezzern sicherhait vnd gedaechtnüzz an den brief gehangen hat im vnd seinen Eriben an allen schaden, gebn an sand Görgen tag nach Christes gepürtt dreutzzechen hundert iar vnd in dem Syben vnd sibentzkistem iar.

Source Fulltext: OÖUB 9 (Wien 1906) S. 244-245