Ich Hans hern Ottens des Ma^emchamer Pfarrer ze Mernpach sun, mein hausfraw Kathrey vnd Erasm vnd Christan vnd Görg dez oben genanten Hansen pru^eder veriehen offenbar mit dem prief allen läuten, daz wir gewariven haben von dem erwu^erdigen Herrn hern Dietmarn probst ze Reichersperg vnd von dem conuent da selbz ir guet daz da haizzt ze Abstett gelegen in Rieder gericht in Mernpekcher pfarr also zu vnsern fünf leiben vnser lebtäg mit allen den ern rechten vnd nu^ettzen di dar zu^e geho^ernt oder da von becho^emen mu^ogen besu^ocht oder vnbesu^ocht ze haus, ze hof, ze holtz vnd ze veld mit so^elcher beschaiden, daz all zeit vnser ains vnter vns welichs daz sey dar auff häwsleich vnd päwleich sittzen sol, vnd su^olln in da von järleich dienen vnd geben an sand Michels tag ain pfunt pfennig wienner münzz vnuerzogenleich in di oblay den herrn zu Christans dez Mürhaimer jartag. Täten wir dez nicht, so gent ye v^eber viertzchen tag zwen vnd dreizzkig pfennig ze wandel dar auf. Wu^erd aber in das also drey viertzehen (sic!)¹⁾ von vns verzogen in dhainer weis, so haben wir allew vnser recht gar vnd gantz verlorn an all widerred. Wir su^ellen in auch dienen vnd geben ir weysant di durich recht da von geho^ernt ze geben, daz ist ze Ostern zwen cha^es vnd dreizzkig ayer vnd ze pfingstn zwen cha^es vnd dreizzik ayer vnd ze weinachten zwen chäs vnd schol ye der cha^es sechs pfennig wol wert sein. Wir schu^elln auch chömen in ir stiftaiding all jar mit zwelif pfennig vnd mit zwain hünern vnd darnach an schaden dar auz. Si habent auch allew di recht hintz vns di si habent hintz andern irn behausten holden, dar vmb schu^ellen si vns vorsprechen mit dem rechten alz ander ir behawst holden alz verr si vermügen. Wir süllen auch vnsrew recht weder versettzen noch verchauffen, wir schüllen sew di dez ersten an pieten vnd no^etten, Wolten oder mo^echten si di nicht von von (sic) vns gelo^esen oder chauffen, so mu^egen wir unsrew recht wol versettzen oder verchauffen vor in mit irr hant vnd doch einem geleichen mann, datz dem si irr vodrung alz leicht becho^emen mu^egen alz von vns selb. Vnd wann v^enser obengenant fu^enf leib nicht mer sind vnd abgent, so ist in vnd irm gotzhaus daz obengenant guet hin wider ledig vnd los alz man ez dann vindet ze haus, ze hof, ze holtz vnd ze veld an wider red aller läut. Daz in das also stät vnd vnzebrochen beleib, geben wir in den prief versigelten mit vnsers lieben genädigen Herrn Hern Go^ergens von Ahaim vnd Albrechts dez Vorster ze den zeiten phleger ze Ried, di irew insigel von vnser grozzen fleizzigen pet willen an den prief gehangen habent, in vnd irn erben an allen schaden, dar vnder ich mich obengenant Hans, mein hausfraw Kathrey vnd Erasm vnd Christan vnd Görg also di fünf leib vns verpinden mit vnsern trewn allez daz stät ze haben an gevär daz oben an dem prief verschriben stet. Der geben ist nach Christes gepu^erd dreutzehen hundert jar darnach in dem ächt vnd Sibenczkistem jar an sand Jacobs tag dez heiligen zwelif poten.

Source Fulltext: OÖUB 9 (Wien 1906) S. 485-487