Ich Stephan Chraft Burger ze Pazzaw, ich Elspet sein hausfraw vnd all vnser eriben veriehen —, daz wir mit wolbedachtem mu^et gu^etem willen vnd gesambter hannt nach sümleich vnserr nagsten besten frewnt rat vnd anderr erbar läut weisung vnser Ekkhaus aller zugehörung gelegen hie ze Pazzaw in der stat, datz Stadel bei dem Jn ze nagst oben an dem haus vnd waz ez ee dez Chrapffner saligs gegen dem ffrawnchloster über für ein freis ledigs vnuerchumbertz aigen do nicht mer auff ligtt dann zwelif wienner pfennyng gruntrechtz gehörent di selben ffrawn ze Nidenburkch an mit allen ern rechten vnd nu^otzzen di dartzu gehörent oder davon becho^emen mu^egen redleich ze chauffen geben haben dem beschaiden mann Wernharten dem Gästlein Bürger ze Pazzaw Kathrein seiner hausfrawn vnd allen iren beden eriben vmb ein solich gelt daz si vns gäntzleich verricht vnd gewert habent . . Vnd wann wir in daz selb haus aller zugehörung mit Salmans hannt ze fu^ertzicht aufgeben vnd geselt haben, also gewönlich ist in der mazz, daz wir vnser eriben noch ander nyemant von vnsern wegen do hin noch darnach dhain ansprach noch vodrung nymmer haben vnd nicht gewinnen schüllen weder mit recht noch an recht . . — Vnd waz brif oder vrchund her für chämen, gelesen oder getzaigt wurden, wo daz wär oder wie sich daz fügt von vns vnserr eriben oder von ander jemand von vnsern wegen di in an irem egenanten haus des chauffs geschaden möchten oder ze beswarung chömen möchten, di süllen all ab tod fürnichtew sein vnd nicht chraft haben dhain wegs. Mit vrchund dez brifs der besigelt ist mit meinem Stephans des Chraften anhangundem insigel vnd zu einer getzewnüzz mit dez erbern meins vetern Ffridreichs des Chraften Burgermaister vnd mautter ze Pazzaw insigel den ich vnd mein hausfraw darumb gepeten haben im vnd seinen eriben an schaden vnd verpinden vns darunder mit vnsern trewn stätichleich an geuär. Dez sint zeugen der Engelschalich an dem vischmarkcht, Niclo Chraft, Janns vnd Stephan geprüder, di Rudolf, Wernhart von der Lynden vnd mer erber läut. der brief ist geben an sand Alex tag, do man zalt von Christes gepu^erd drewtzehen hundert iar vnd in dem Acht vnd Sibentzkistem iar.

Source Fulltext: OÖUB 9 (Wien 1906) S. 481-482