Johannes de Schärffenberch Dei gracia prepositus pataviensis et Archidyaconus Maticensis, In Aspach, in Mernpach, in Rozzpach, in Gurten, in Ewerswanch, in Hocholczelle . ., in Waltzell. ., in Münster . ., in Althaim . ., in Geinperg.., in Tayschirchen . ., in Vczenaich . ., ad sanctum Andream in Ort, in Antisenhofen, in Obernperg et in Weilpach ecclesiarum parochialium rectoribus, eorum vicariis vel eorundem vices gerentibus per decanatum Maticensem constitutis quos infra scriptum tangit negotium vel tangere poterit quomodolibet in futurum salutem in Domino sempiternam. Quia venerabiles et religiosi viri domini prepositus et conventus monasterii in Reichersperg canonicorum regularium ordinis sancti Augustini pataviensis diocesis nobis exposuerunt, quod olim plebes ecclesiarum vestrarum singulis annis certis temporibus ecclesiam Pataviensem cum reliquiis suis visitare de jure et antiqua et approbata consuetudine tenebantur, quodque reverendus in Christo pater dominus Wernhardus recolende memorie olim ecclesie pataviensis Episcopus attendens hoc propter aliquorum nimiam distanciam dictis plebibus nimis fuisse et esse onerosum, ex eisdem et aliis causis racionabilibus ipsum moventibus dictam visitacionem duxit racionabiliter commutandum. Statuens ut de qualibet domo in dictis vestris parochiis constitutis aut constituendis in futurum singulis annis in recompensam hujus visitationis per eorundem domorum inquilinos pro officio custodye et pro emendandis et conservandis ornatibus dicti monasterii in Reichersperg unus denarius monete wiennensis realiter custodi ejusdem monasterii pro tempore solveretur, prout in privilegiis ejusdem domini Wernhardi Episcopi super hoc confectis plenius dicitur contineri, dictique prepositus et conuentus in ejusdem denarii perceptionis possessione a tempore dicti statuti et usque ad legitimam prescriptionem fuerint, prout sunt salvis subscriptis pacifice et quiete. Et quia prout pro tempore dictorum prepositi et conuentus fuit subjunctum, eosdem denarios de dictis plebibus vestris aliquando colligere, prout actenus fuit consuetum, negligenter obmisistis, aliquocies eciam eosdem denarios per vos collectos vobis ipsis in injuriam dictorum prepositi et conuentus inbursastis de facto ac eosdem dicto custodi tradere contra dixistis, ita quod hodie dicta custodya in hujus denarii perceptione extitit plurimum defraudata, Nos igitur nolentes in dicto negocio precipitanter agere, discreto viro domino Johanni plebano et decano nostro in Althaim dedimus in mandatis quatenus se de premissis et presertim si dictum monasterium in possessione hujus denarii percipiendo fuerit tam diu quod prescripcio super hoc fuerit legitime completa. Super quibus idem decanus debite informatus nobis, quod ita fuerit ut premittitur, plenam et fide dignam fecit relacionem. Quare vobis universis et singulariter singulis sub pena excommunicacionis iam late sententie quam in vos et quemlibet vestrum ex nunc, prout ex tunc ferimus in hiis scriptis canonica tamen monicione premissa, si mandatum nostrum in hac parte fuerit quoque fraudis comento transgressi, districte precipiendo mandamus, quatenus quilibet vestrum plebes sibi subjectas ad dicti denarii solucionem singulis diebus dominicis et festivis, quando ad audienda divina congregate fuerint fideliter et sollicite inducatis et quantum potest(is) exhortetis ac hujus denarii nomine dicte custodye tollere levare et colligere solliciter studeatis, prout aliter fuit consuetum, et non solventes et solvere contradicentes per sacramentorum ecclesiasticorum subtraccionem preter viaticum penitenciam et baptismum parvulorum auctoritate nostra compellentes ac hujus collectam dicto custodi prenotare integre et fideliter studeatis precaventes omnino, ne vobis de eisdem denariis preter expressum consensum et scientiam dicti custodis in Reichersperg quidquam usurpetis vel retineatis sub penis antedictis scituri pro certo, quod si aliquis in premissis seu premissorum quolibet excesserit et super hoc coram nobis fuerit convictus, quod ipsum justicia mente taliter corrigemus, quod ceteris evidenter cedet in exemplum. Datum Patauie XXIIIJ mensis februarii die, Anno Domini millesimo trecentesimo septuagesimo nono sub sigillo nostro majori appenso.

Source Fulltext: OÖUB 9 (Wien 1906) S. 583-585