Ich Vlreich Pfarrer ze Chirichslag vnd ich Fridreich der Viuiantz veriehen offenbar mit dem brief allen lewten, das wir gelten sullen dem erbern Herrn Hern Dietmarn Probst ze Reichersperg vnd dem Conuent daselbs an zway dreizzig pfunt pfenig wienner münzz an dem leitchauf, den wir sew viertzehen pfunt richten vnd wern sullen auf sand Giligentag der schirst chümbt vnd die andern viertzehen pfunt auf den selben tag der darnach schirst chümbt über ain Jar. Wir süllen in auch das vorgenant gelt antwu^orten ye zu den tagen gen Chrems in irn hof irm hofmaister mit vnserm poten an allen irn schaden. Te^aten wir des nicht, wie getanen schaden si des ne^amen, den si gesprechen mügen pey iren trewn vngesworn vnd an recht, den sullen wir In abtu^en mit sampt dem hawptguet vnd sullen si das haben dacz vnsern trewn vnd auf aller vnßer hab, wo wir die haben, wir sein lembtig oder tod. Wir sein in auch des Geltz schuldig worden vmb ir drittail zehentz ze Chirchslag di wir daru^ober bestanden haben ze flust vnd ze gwin von In von hinn vntz auf die liechtmess vnd darnach über ain Jar also die zwey nütz, vnd darnach habn wir nichtz mer darauf ze sprechen weder wenig noch vil vnd mügen dann fürbaz lassen mit vnserm guetleichen willen wem si wellent. Wer auch den brief von irn wegen Jnnhat vnd vns damit dermont, dem sey wir alles des schuldig vnd gepunden als oben an dem brief verschriben stet vnd zu vrchund geben wir Jch obgenant Vlreich pfarrer zu Chirchslag vnd ich Fridreich der Viuiantz obgenant den brief Versigelten mit vnsern anhangunden Jnsigln. Geben nach Christes gepürd drew czehen hundert Jar darnach in dem Newn vnd Sibentzkisten Jar an sand Vrbanstag.

Source Fulltext: OÖUB 9 (Wien 1906) S. 643-644