Ich Stephan der Rockelfinger puriger ze Pazzaw, mein hausfraw Diemu^et vnd all vnser erben veriehen offenbar mit dem brief alln lewten di in sehent, hörent oder lesend, daz wir mit gunst vnd nach rat vnser besten frewnt ze der zeit vnd weil vnd wir ez wol getu^en mochten ledichleichen vnd vreyleichen auf geben haben vnser haws an dem uruar ze Obernperig gelegen zenächst pey O^ettleins dez Verygen haws den chorherrn gen Reichersperig in ir oblay da di obgenant herrn vormalen järleichen fünff schilling phennig auf habent von dem Lämplein dem Got genad auch etwann puriger ze Obernperig an dem vrvar dez daz obgenant haws ze der selben zeit gewesen ist vnd daz haben wir in also aygenleichn gebn auz vnser nütz vnd gewer in di irn mit allen ern, rechten vnd nützzen vnd durich recht dar zu gehörent oder da von becho^emen mügen, in der haws oder auzer haws vnd dar zu^e mit gerichtz hant vnd habn in daz auch bestätt mit aller stät vnd durich recht dar zu^e gehöret, also der hofmarich recht ist ze Obernperig an allez gevär, also mit der beschaiden, daz si vnz dar vmb her wider vnd auch vnsern voruarn vnd nachcho^emen vnd besunder Otten dem Sneyder vnd Hansen dem Albrant den paiden Got genad ainen jartag ja^erleichen begen su^ellen mit dem chor ze na^echst nach den weyna^echten, wann si ez aller leichtest von dez ordens wegen getu^en mügent dez nachtes mit ainer vygily vnd dez morgens mit ainer gesungner Selmess. Wär daz sew dhainerley chrieg von dez obgenanten haws wegn an ging, daz waer von vnz oder von vnsern wegen, wi sich daz fu^egte oder wie daz gescha^ech daz sulln wir vnd vnser erbn in gar vnd ga^entzleichn auzrichten an aller stät wo in dez not geschicht an alln irn schadn. Vnd daz in daz allez also war, stätt vnd vnzeprochen beleyb, dar über gebn wir in den offen brief zu ainem waren vrchund versigelten mit der erber Meingozz dez Elrichinger vnd mit Wolfhartz dez Lazzer ze den zeiten Richter ze Obernperig paider anhangenden insigeln di si paid durich vnser vleizzig pett wegn vnd auch zu^e ainer güten zewgnu^ezz vnd gedächtnüzz der obuerschribn sach an den brief gehangen habnt in vnd irn erben an schadn, dar vnder wir vnz also wir oben genant sind verpinden mit vnsern trewn an aydes stat allez daz war vnd stätt ze habn an gevär daz obn an dem brief verschriben stet. der geben ist nach Christi gepu^ert drewtzehen hundert iar vnd darnach in dem achtzigysten dez na^echsten freytags vor sand Jöreygen (sic) tag.

Source Fulltext: OÖUB 9 (Wien 1906) S. 837-838