Johannes Dei gracia episcopus Patauiensis dilectis nobis in Christo decano et conventui monasterii in Reichersperg ordinis sancti Augustini canonicorum regularium mee diocesis salutem et affectus in domino salutares. Ne pro defectu pastoris gregem dominicum lupus rapax inuadat aut in facultatibus suis ecclesie ac monasteria grave paciantur dispendium, iura volunt ac ratio swadet, cedentibus vel decedentibus prelatis alios cum maturitate debita subrogari. Sane vacante nuper dicto vestro monasterio per obitum bone memorie domint Dietmari ultimi prepositi illius vos vocatis omnibus, qui debuerunt voluerunt et potuerunt comode interesse, ad eleccionem futuri prepositi procedentes dilectum in Christo Griffonem dictum Ottenperger canonicum et professum eiusdem vestri monasterii vobis ipsique vestro monasterio concorditer et canonice eligistis in prepositum et prelatum, qui quidem electus victus precibus vestris elecioni huiusmodi de se facte curauit humiliter consentire. Post que pro parte eiusdem electi nobis extitit debita cum instancia supplicatum, quatenus eleccionem eandem confirmare auctoritate ordinaria dignaremur. Porro ne contra doctrinam apostoli cito manus videremur imponere in dicto vestro monasterio, proclamationem seu citacionem mandauimus fieri generalem, ut si quis vel si qui esset vel essent, qui contra formam eleccionis huiusmodi aut personam electam aliquid dicere seu opponere haberent seu vellent, in die beate Margarete virginis, que tunc immediate sequebatur, pro omnibus dilacionibus et termino peremptorio ad hoc deputata mane hora terciarum coram nobis Patauie compareret seu comparerent ad dicendum et opponendum in premissis et aliter faciendum, prout qualitas exigeret negotii memorati, alioquin in petite confirmacionis negocio, ut iustum foret, procederemus cuiusquam absentia non obstante. Quo die seu termino veniente facta nobis fide de execucione proclamationis seu citacionis antedicte, cum nullus appareret oppositor vel contradictor, eleccionem ipsam et personam electam coram nobis ibidem Patauie personaliter constitutam examinari fecimus diligenter et quia eleccionem eandem in forma debita videlicet inspiracionis et de persona ydonea invenimus canonice celebratam, ipsam eleccionem invocato Dei nomine confirmauimus et tenore presentium confirmamus, ipsumque electum per anuli tradicionem inuestimus presentialiter de prepositura monasterii supradicti, curam et regimen animarum ac administrationem spiritualium et temporalium ipsius ei tenore presentium committentes. Ad vos igitur remittentes eundem devotionem vestram requirimus et hortamur^a) attente vobis nichilominus in virtute sancte obedientie firmiter precipiendo, quatenus ipsum cum debita suscipientes reuerencia et honore sibi tam in spiritualibus quam temporalibus obediatis tamquam vestro preposito et prelato, alioquin sentencias, quas in vos rite tulerit, et penas, quas statuerit, ratas habebimus et faciemus, auctore domino inviolabiliter obseruari. In quorum testimonium et certitudinem pleniorem presentes litteras scribi et sigilli nostri inpressione fecimus roborari. Datum ibidem Patauie, in die beate Margarete virginis prenotata, anno Domini millesimo trecentesimo octuagesimo sexto.

Source Fulltext: OÖUB 10 (Wien 1933) S. 384-386