Bonifacius episcopus seruus seruorum Dei. Dilectis filiis canonicis monasterii Reychenspergensis ordinis sancti Augustini, Ulrico preposito mo(nast)erii in Suben eiusdem ordinis, Nicolao Wendelstain, Hermanno de Oltz armigeris et dilectis in Christo filiabus Anne et Dorothee eorum uxoribus P(at)auiensis diocesis salutem et apostolicam benedictionem. Deuotionis vestre sinceritas promeretur, ut uotis vestris in hiis presertim que ad uestrarum salutem animarum cedere ualeat, quantum cum deo possumus, fauorabiliter annuamus. Dudum siquidem felicis recordacionis Urbanus papa VI predecessor noster ex certis rationabilibus causis ad id eius animum mouentibus de consilio etiam fratrum suorum, de quorum numero tunc eramus, et apostolice potestatis plenitudine statuit, ut universi Christi fideles vere penitentes et confessi, qui in anno a natiuitate domini nostri Jesu Christi millesimo trecentesimo nonagesimo instante tunc futuro et deinceps perpetuis temporibus de triginta tribus annis in triginta tres annos beatorum apostolorum Petri et Pauli basilicas de urbe ac Lateranenses et sancte Marie maioris de dicta urbe ecclesias causa deuocionis visitarent, plenissimam omnium peccatorum suorum veniam consequerentur, ita videlicet ut quicunque vellet huiusmodi indulgentiam assequi, si Romanus^a) ad minus triginta continuis vel interpolatis semel saltem in die, si uere peregrinus aut forensis existeret, modo simili quindecim diebus ad easdem basilicas et ecclesias accedere teneretur, prout in dicti predecessoris litteris inde confectis plenius continetur. Cum autem, sicut exibita nobis nuper pro parte vestra peticio continebat, nos ex singulari deuocionis fauore basilicas et ecclesias urbis predictas, ut indulgenciam huiusmodi assequi possetis, in propriis personis libenter uisitaretis, sed quia propter iteneraria pericula et aliis certis de causis desideria uestra huiusmodi comode adimplere minime potestis, pro parte vestra nobis humiliter supplicatum (est), ut super hec nobis providere de benignitate apostolica dignaremur. Nos igitur uolentes vos premissorum intuitu favoribus presequi graciosis huiusmodi supplicacionibus inclinati, ut confessor, quem vos duxeritis eligendum, nobis et cuilibet vestrum auctoritate apostolica concedere valeat, quod uos vere penitentes et confessi indulgentiam huiusmodi assequi valeatis, ita tamen, quod idem confessor laborem et expensas, quos vos pateremini, si propterea ad urbem predictam veniretis, in alia pietatis opera vobis comutet et oblaciones, quas ad basilicas et ecclesias predictas vos oblaturi fuissetis, si ad illas personaliter venissetis, ad eas fideliter et sine dilatione transmittatis et loco visitacionis basilicarum et ecclesiarum predictarum aliquas ecclesias per dictum confessorem vobis deputandas quindecim diebus continuis vel interpolatis semel saltem in die infra annum huiusmodi, si comode poteritis, alioquin infra festum Resurreccionis domini nostri Jesu Christi proxime venturum visitetis, devocioni vestre tenore presencium indulgemus. Nulli ergo omnino hominum liceat hanc paginam vestre concessionis infringere vel ei ausu temerario contraire. Siquis autem hoc attemptare presumpserit, indignationem omnipotentis Dei et beatorum Petri et Pauli apostolorum eius se nouerit incursurum. Datum Rome apud sanctum Petrum XII Kal. Januarii pontificatus nostri anno secundo.

Source Fulltext: OÖUB 11 (Wien 1983) S. 61-62