In nomine Domini amen. Anno natiuitatis eiusdem millesimo trecentesimo nonagesimo primo indiccione quartadecima die vero vicesimo primo mensis Novembris pontificatus sanctissimi in Christo patris et domini nostri domini Bonifacii diuina prouidencia pape noni anno secundo in mei notarii publici testiumque presencia subscriptorum personaliter constituti honorabiles et circumspecti viri domini Johannes de Mawrheim canonicus ecclesie Frisingensis et Johannes Preller decanus et plebanus in Obernperig Patauiensis diocesis, succollectores decime papalis serenissimo principi domino Stephano duci Bauarie etc. cedende et per dictum sanctissimum in Christo patrem dominum Bonifacium papam eidem domino duci deputate, qui quidem prescripti succollectores venerabilem patrem dominum Griffonem prepositum et eius conuentum monasterii in Reichersperig ordinis sancti Augustini canonicorum regularium dicte Patauiensis diocesis alias ob nonsolucionem dicte decime excommunicauerunt et ipsius predictum conventum a diuinis suspenderunt ac ipsum monasterium ecclesiastico supposuerunt interdicto ipsos que sic, ut prefertur, denunciandos (esse) publice mandauerunt. Ibidem dicti domini prepositus et conventus ad gremium sancte matris ecclesie reuersi et huiusmodi decimam papalem ipsis impositam videlicet viginti octo libras denariorum wiennensium publice integraliter complete et laudabiliter dictis succollectoribus in parata et numerata peccunia persoluerunt ac etiam cum debita instancia absolutionem a dictis sentenciis excommunicacionis et relaxacionem suspensionis et interdicti sentenciarum humiliter pecierunt. Quiquidem domini succollectores huiusmodi peticionibus tamquam iuri et racioni consonis fauorabiliter annuentes et attendentes, quod sancta mater ecclesia non claudit gremium vnicuique redeunti, ac dictos dominos Griffonem prepositum et conuentum auctoritate apostolica in hac parte ipsis et cuilibet ipsorum commissa sollempniter et debite a suprascriptis sentenciis omnibus et singulis absoluerunt in forma sacro sancte Romane ecclesia debita et consueta iniunctis eisdem domino preposito et conventui pro modo culpe penitencia salutari. Insuper ibidem prefatus dominus Johannes de Mawrheim canonicus Frisingensis et succollector decime papalis suprascripte publice confessus fuit et recognouit, se esse solutum plene ac pagatum a dicto domino preposito et conventu monasterii in Reichersperig de dicta decima papali ipsis imposita plenarie in parata et numerata peccunia et se (esse) nomine dicti domini nostri pape et prescripti illustris principis ducis Stephani, cuius eciam prothonotarius pro nunc existeret, bene contentum, ac eciam ibidem idem dominus Johannes des Mawrheim succollector prefatos dominos Griffonem prepositum et conunentum publice et sollempniter ac expresse de dicta solucione plenaria prefate decime papalis sibi imposite quietos et liberos ac solutos dixit et fassus fuit ac quo supra nomine prefati domini nostri pape et ducis Stephani quittauit libere et absoluit et quietat per presens publicum instrumentum melioribus modo causa iure et forma, quibus melius et efficacius potuit cum effectu. Super quibus omnibus et singulis premissis prefati domini Griffo prepositus et conuentus pecierunt sibi per me notarium publicum pre-et infrascriptum vnum vel plura publicum seu publica confici instrumenta. Acta sunt hec in dicto monasterio Reichersperig in stuba parua prefati domini prepositi anno indiccione die mense et pontificatu prescriptis hora quasi nona presentibus honorabilibus viris dominis Vlrico Ortolfi rectore parochialis ecclesie in Leukental Kyemensis diocesis Johanne Eberhardi de Naternberg et Conrado Achleiter notario publico clericis Ratysponensis et Frisingensis diocesis et pluribus aliis fide dignis testibus ad premissa vocatis specialiter et rogatis. Et ego Heinricus Kekch clericus Patauiensis publicus apostolica et imperali auctoritate notarius premissis absolucioni summarum et relaxacioni pecuniarum solucioni recognicioni quietationi omnibusque aliis prescriptis, dum sic, ut premittuntur, fierent et agerentur, vnacum prenominatis testibus presens interfui eaque omnia et singula sic fieri vidi et audiui. Ideo hoc presens publicum instrumentum exinde confeci et in hanc publicam formam redigi per alium (notarium) me aliis arduis occupato negociis fideliter scribi feci, hic me manu propria subscripsi ac signo et nomine meis solitis et consuetis signaui rogatus et requisitus in fidem et testimonium omnium premissorum. Approbo eciam rasuram in secunda linea deorsum numerando in dictione videlicet vicesima prima factam non ex vicio sed errore.

Source Fulltext: OÖUB 11 (Wien 1983) S. 57-59