Hochwirdiger gnädiger vnd edler herr von Hochenlo, Her Gorig Bischof von Pazzaw.||
Ich Heinrich Chern vnd mein erben ewer gnaden vndertänig dyener lazzen ewer gnad wizzen, daz vns dy wirdigen vnd geistlichen herren Greyff propst zw Reichersperig vnd der conuent daselbs grozz fudrung vnd gnad getan haben, daz sy vns vnser hab habent pracht von fremder hannt in vnser gewalt wider vmb hundert phunt vnd vmb zehen phunt gueter Wienner phennig. Dyselb haben wir in geslagen vnd gelegt auf vnsern Obernhof ze Lind genant der Mairhof gelegen ze nechst bey dem Brunn vnd auf den zehent daselbs aller zwgehorung nichts ausgenommen, daz alles von ewern gnaden vnd eins Bischofs zw Pazzaw, wer der zw den zeyten ist, vnser rechtz lehen ist. Bitten wir ewer gnad, daz ir dem obgenannten herrn vnd seinem gotzhaus daz vorgenante gelt auf dem egenanten hof vnd zehent aller zwgehörung nichtz ausgenomen gnädichleich bestätt mit stat, dy dar zw gehört nach irr brief lawt vnd sag, dy sy vnd ir gotzhaus von vns vnsern eriben dar vber habent. Daz wellen wir vnd all vnser frewnt vmb ewer gnad vnd ewer gotzhaws verdienn, wye wir sullen vnd vermugen. Vnd wann ich selb vor chranchait zw ewern gnaden nicht chomen mag vnd auch aygens insigels selb nicht han, sent ich vnd mein eriben ewern gnaden den brif besigelten mit der erbern vnd weysen Gorigen dez Tuemayr dy zeyt phleger zw Obernperig vnd Lienhard dez Thalinger aygen aufgedrukchten insigeln, dy si durch mein vnd meiner eriben vleizzig pet vnd willen auf den brief gedruckcht habent in vnd iren eriben an schaden. Darumb lub ich vnd mein eriben mit vnsern trewn vnder der vorgenannten insigeln trewleich vnd vnguerleich statt ze haben dy stat, dy ewer gnad darvber tuet. Der pet vmb dy stat vnd insigel sind zewgen dy erbern Christan Swentter Hanns Hawtzenperger Symon von Lind vnd ander piderblewt genug. Geben dez Samptztags an vnser Frawenabent ze Liechtmezz.

Source Fulltext: OÖUB 11 (Wien 1983) S. 248-249