Ich Peter Kalbekch, die zeit richter ze Scherdingen, vergich offenbar mit dem brief, das für mich chom, da ich sas in offner schrann zu Scherdingen an dem rechten, der erwirdig herre brobst Greyff ze Reichersperig von seinem und seins gotzhawzz wegen mit brifen und mit vorsprechen und chlagt auf alle di hab und übertewrung, die Ulrich der Chern sein hawsfraw und ir eriben hieten uberal in der herschafft und gericht ze Schärdingen, welherlay hab oder guet daz wer, aygen aekcher wismad oder zehent, wo die gelegen wär ze Prukklewten ze Lind und besunder auf den zehent und übertewrung ze Antesenhofen, die sy verchawfft sollen haben, des si nicht gwalt hieten ze tun nach seiner brief lawtt und sag, di er und sein gotzhaws von in darüber hieten, und chlagt als lang, das er alle seine recht envollen gechlagt, das im niemand zu antwurtt chöm, vnd pat darumb ze fragen, was recht wär. Da sagt frag volig urtail und das recht, seind der von Reichersperig alle seine recht envollen geklagt hiet und nu niemand ze antwurtt komen wär, er solt bei der schrann beleiben, di weil ich an dem rechten säzz, ob yemand chäm, der es verantwürtten wolt, darnach geschäch, was recht wer. Chäm aber niemant, so solt der von Reichersperig bey allen seinen rechten beleiben nach seiner brief und urchund lawtt und sag und solt ich in und sein gotzhaws weltigen mit dem stab und der ambtman ze haws und ze hof aller der hab und übertewrung, di Ulrich der Chern sein hawsfraw und ir eriben hieten ze Prukklewten ze Lind und besunder des zehentz und ubertewrung ze Antesenhoven oder wo si di anderswo hieten in der herschafft und gericht zu Schärdingen und solt ich im und seinem gotzhaws darüber geben einen gerichtbrif und der herschafft rue und scherm. Das hab ich alles getan, als ez das recht gesagt hat. Und des zu vrkund gib ich ym und seinem gotzhaws den brif von gerichtz wegen, als er dez selben tags mit dem rechten ertailt ist worden, versigelt mit meinem anhangundem insigel. Des sind zeugen di erbern, di dezselben tags an dem geding gesezzen sind, her Christan Ramstorffer di zeit pfleger am Newnhawz gegen Scherdingen über, Eysenreich Dreflinger, Herwart Ottenperiger Peter Remppeltzheimer, Ulreich Ottenperiger, Heinrich Hutstokch und ander biderb lewt genug. Gehen an nächst Pfintztag vor Liechtmess nach Christi geburd drewczehenhundert iar und darnach in dem viervndnewntzigistem iar.

Source Fulltext: OÖUB 11 (Wien 1983) S. 247-248