Wir Gorig von Gotes genaden bischof ze Passaw bechennen und tun kunt offenleich mit dem brief gegenwürttigen und künftigen, daz für uns kome der erber Heinreich der Kern ||
und gab uns auf mit gutem willen seine lehen zu Lind hof und zehent mit allem irm zugehörn besucht und unbesucht, wie das genant ist, und er pat uns vleizzig, daz wir dieselben lehen alle und was darzue gehört dem erwirdigen und unserm lieben in Got Greiffen die zeit probst und dem convent des chlosters ze Reichersperg unsers bistumbs ruchten ze bestätten, wannd er in die redleich verchauffet hiet, als der chaufbrief, den er in darüber geben hat, lawtt und sagt, und wannd dieselben lehen alle und was darzu gehört von unserm gotzhaws ze Passaw enher lehen sind gewesen, als si auch die zeit warn, paten uns auch besunderleich die obgenanten der probst und convent desselben chlosters ze Reichersperg gar diemutichleich und mit vleizze, daz wir in und demselben irem chloster die obgenanten lehen alle von sundern genaden suchten ze aigen, das doselbs der goczdienst dest pas gehalten und auch davon gemert werde. Nu haben wir angesehen ir diemuttige gepet und das wir schuldig sein gotzdienst ze mern und all unser undertanen besunderleich geistleich läwt ze fudern, wo wir mügen, und haben mit gunst und willen unsers ernwirdigen capitels ze Passaw den egemelten chawf bestatt und besteten den auch und aigen wissentleich mit kraft des briefs dieselben lehen alle und was darzu gehört, den vorgenanten dem probst dem convent und dem chloster ze Reichersperg dobey hinfür ewichleich in aigens gewer ze beleiben, als ander desselben chloster aigen gut, an alles gevar. Und ze widerlegung des obgenant lehen und lehenschaft hat der erber Christan der Swenntter in guter mainung und sunder lieb, die er hincz dem offtgenanten chloster ze Reichersperig hat, seins rechten freys aygen den hof ze Langenstadel und was darzu gehört, der als gut ist und pesser, denn die obgeschriben lehen, von uns und unserm goczhaws ze Passaw ze rechtem lehen genomen, als der brief wol weiset, den er uns und unserm goczhaws darüber geben hat. Und ze urkunde und stetichait aller obgeschriben sache und hanndlung geben wir den brief besigelten mit unserm und des egenanten unsers ernwirdigen Capitels ze Passaw angehangen insigeln, demselben unserm capitel an iren läwten und gutern, die es besunderleich hat, doch an schaden. Geben ze Passaw an nachsten Samptztag nach sand Pangracijtag, nach Kristi geburde drewczehenhundert iar und in dem vierundnewntzigistem iare.

Source Fulltext: OÖUB 11 (Wien 1983) S. 280-282