Wir Greiff von Gocz genad probst zu Reichersperig vnd der conuent gemainchleich daselbs verichen offenbar mit dem brief allen leuten, das wir vnser gut genant auf dem Puhel im Vczental gelegen in Rieder gericht vnd in Gurttner pharr, das vnser freis aigen ist, lassen haben zu leibgeding Thoman vnd Jörgen gebrüdern Chunrats sun aus dem Vczental also zu irn vorgenanten vier leibern ir lebtag vnd nicht lenger in der beschaiden,das si das egenant vnser gut an aller stät stiftlich vnd pawlich innhaben vnd legen vnd häwsleich besiczen sullen vnd jerlich, wie es beiärt, vns vnd vnserm goczhaus dauon dienen vnd raichen sullen ze Ostern vier chäs, daz yeder chäs sechs phenning wol wert sey, und sullen auch in vnser stifttaiding chomen, wann in darin gepoten wirt alz andern vnsern holden, (II mit vier hünern) vnd an schaden daraus. Auch haben wir alle die recht hincz vns, die wier haben hincz andern vnsern behawsten holden. Darumb sullen wir sew versprechen mit den rechten alz ander vnser behausten holden vnd sullen si sich mit dem obgenanten gut nyndert anders wohin anherren noch dhain versprecher oder rechten suchen nur zu vns vnd vnserm goczhaus an gewer. Si sullen auch dem vorgenanten vnserm gut nichcz entziehen smelen noch auswechseln noch dhainerlay hindan verhandeln noch emphrömden in dhainer weis. Auch sullen noch mögen si irew recht weder verseczen noch verchauffen noch in dhainerlay weis verchumern nur vor vns mit vnser hant willen vnd wissen. Versäzzen oder vberfirn sy ||
aber dhainerlay, das an dem brief verschriben stet, so habent sy alle irew recht, di si habent auf dem obgenanten gut verlorn gor vnd gancz vnd sind vns dann herwider veruallen in vnser gewalt an alle widerred. Vnd wann auch die obgenanten vier leib nicht mer sind vnd abgent mit dem tod, so ist vns vnd vnserm goczhaus das vorgenant gut im Vczental vnd waz darzu gehört nichcz ausgenommen ledig vnd loz worden an allen krieg vnd anspruch, wie man ez dann vindt ze haus ze hof ze holcz vnd ze velden vnd hat dann dhainer ir erben freunt noch nachkomen noch von irn wegen darauf ze sprechen in dhainer weis.Das daz also stet vnd vnczebrochen beleib, geben wir in den brief besigelten mit vnsern anhangunden insigeln, geben nach Christs gepurt drewczehenhundert jar darnach in dem sechsvndnewnczkisten jar an sant Philipp vnd sant Jakobstag der heiligen zwelifpoten.

Source Fulltext: OÖUB 11 (Wien 1983) S. 502-503