Wir graf Vlreich graf von Schawnberge bechennen offenlich mit dem briefe, das für vns chomen ist der ersam her Greiff brobst vnd der conuent ze Reichersperg mit einem alden brief in lateyn geschriben, den in vnser voruodern grafe Heinreich vnd graf Wernhart von Schawnberg selig geben habent vber den wasser flus vnd gankch zu sande Vlreich, vnd paten vns diemutikchlichen, das wir in denselben brif geruchtten ze uernewen vnd bestätten, darumb daz in die alten vrchunde icht abgingen. Desselben brifs lawtt in däwtsch ist also:||
Wissen alle die, die gegenwärtigen schrift an sehende sein, das wir Heinreich vnd Bernhardt gebrüder von Schawnberge geben haben der kirichen Reichersperig des wasser flus vnd seinen gankch vber vnser wisen zu sande Vlreich von vnser gabe wegen frey vnd ledikleichen ewiklich ze besitzen. Das aber die vnser gabe stät beleibe vnd vnczerbrochen, haben wir den gegenburttigen brief mit kraft vnsers insigels bezaichnet mit der vnnderschriben zewgen der vorgenanten kirchen geben zu einer sicherheit. Des sind zewgen her Dietmar von Hugenperg, her Ludwig der Schifer, her Sybrand, her Chunrad von Ffurt, Vlreich Schifer, Chunrad von Strahen, Lewtold von Keimpach, Hawg von Weyderuelde, Chunrad von Drechselhaim vnd ander genüge.||
Nu sein wir obgenanter grafe Vlreich hincz ir pet gunstlichen genaiget vnd haben bedacht, das wir gotzhawser vnd geistlich läwt fudern sullen vnd auch wellen, vnd auch angesehen haben die genade vnd fudrung, die in vnser voruordern getan habent, vnd haben in denselben brief vernewet vnd bestätt vernewen vnd bestatten in auch mit chraft ditz gegenwurttigen briefs in aller der masse, als er in von vnsern voruordern geben ist worden. Daruber zu vrchund geben wir in den brief besiegelten mit vnserm anhangundem insigel, geben zu Schawnberge an Freytag nach sand Erhartstag dez heiligen bischofs nach gepurt Christi drewtzehenundert iar vnd in dem syben vnd newntzigistem iare.

Source Fulltext: OÖUB 11 (Wien 1983) S. 584-585