In nomine sancte et indiuidue trinitatis ego Reginbertus dei gratia patauiensis ecclesie humilis servus et minister notum esse cupio, quod nobilis homo quidam Adilrammus de Berge aduocatus ecclesie sancti floriani diuina instructus misericordia ius quoddam aduocatie sue, uidelicet oblationes rusticorum inter duos fluuios Trunam et Anasum, quod Meginhardus de Ippha beneficiario iure ab eodem Adilrammo susceperat, in manus meas resignauit ea scilicet ratione, ut ego super altare sancti floriani prefatum ius aduocatie delegarem, ut, si ipsa ecclesia sancti floriani aut per uiolentiam aut per negligentiam ipsius aduocati detrimentum aliquod passa fuit, hac reconpensatione condonatum a domino et a sancto floriano indulgeretur. Tali igitur ratione predictum ius aduocatie, sicut ab Adilrammo in manus meas traditum fuerat, super altare s. floriani delegaui. Cuius delegationis testes sunt Adelram de Chamba, Warmunt de Wizzinbach, Meginhart de Ippha, Ogo de Pazrichesivanc, Borno et filii eius Rodiger et Borno, Chonrat, Rodolf, Willehalm de Muleheimen, Lotwin. Hanc igitur traditionem firmissima banni tuicione et sigilli nostri inpressione firmauimus, ut nullus succedentium aduocatorum aut aliqua persona hoc audeat infringere. Si vero aliquis huius tradicionis decretum uiolare presumpserit, sciat se auctoritate beati Petri et domni apostolici et nostra pro tarn nefario ausu exconmunicatum et nisi resipiscat, usque ad finem uite sue a conmunione ecclesie segregatum. Date Anno ab incarnatione domini Millesimo C. XL. V. III. Idus Martii, Papa Lucio, Rege Chonrado, Prefati cenobii s. floriani Preposito Dietmaro.

Source Fulltext: OÖUB 2 (Wien 1856) S. 216-217