Cvm iuxta varietatem capitum sensus etiam hominum varientur, liquet, quod plerique successores facta precedentium, quamuis iusta et rationabiliter reprobantes consueuerunt multociens infirmare, necessarium igitur esse dinoscitur, ut ea, que geruntur ab hominibus, litterarum testimonio perhennentur. Proinde nos V/olschalcus prepositus totusque conventus Domus sancti Floriani ad noticiam tam presentium quam futurorum tenore presentium volumus pervenire, quod, cum Monasterii ac aliarum rerum ad diuinum cultum pertinentium carentia amaritudinem cordium nobis non modicam generaret nec quisquam reformationi eiusdem daret operam pro nostre desiderio voluntatis, manus proprias tandem mittentes ad fortia, de communi consilio duas vineas, quarum vna Stezenpach, altera Stranaz nuncupatur, quas a quibusdam laicis, qui eas pheodali tytulo ab eadem nostra Ecclesia longo tempore prius possederant, pro pecunia prompta absoluimus, ad opus nostri Monasterii tradidimus perpetuo seruituras. Item vineam in Haytal et Predium quoddam in superiori vro^enlevten situm, que a domino Lvtwico plebano de Gv^oetav, qui eadem ab ecclesia nostra habet in pheodo, in obligationem pro pecunia operis, ne ad extraneos ulla necessitate inminente deuoluentur, accepimus, eidem operi indulgemus. Insuper donationem Huebe in Mos site, qvam Dominus Dittericus Wolfstain, dum se in nostro reciperet collegio, de consensu fratris sui Alberti ad idem opus pro remedio anime sue legauit, predicto operi confirmamus volentes, ut de hiis et aliis prouentibus, quos forsan dominus illis superaddere dignabitur, siqua in posterum conpleto etiam opere diruta fuerint vel confracta, Magister operis per conventum electus debeat restaurare. Et ne quispiam prelatorum nobis succedentium factum huiusmodo audeat vel valeat postmodum retractare, in ratihabitionem perpetuam presentem litteram scribi fecimus sigillorum nostrorum Karakterem inprimentes. Actum et Datum anno Domini M. CC. LXXXII. Qvarto Nonas Nouembris.

Source Fulltext: OÖUB 3 (Wien 1862) S. 553-554, Nr. 603