Wand mensleich natvr also gestalt ist, daz si stete beraiter ist ze vbelen dingen denne ze gv^eten, daz der Levte gescheffte mit der hingevnden zeit iht vergezzen werd oder daz man sev mit dehainem valsche iht vercheren oder verirren mvge, so ist des du^erft, daz man sev bestetige mit vrchonde, insigel vnd brief. Da van tv^enn ich Johans vo^en Ro^er chunt mit disem brief allen, di in an sehent oder ho^erent lesen, daz ich dem go^etes havs datz sant Florians havs han ze cho^effen gigeben in rehter aigens gwer vmb sehs vnt dreizzek phvnt phenning wienner mvnze meinen hof an der Eben mit alle dem, daz dar zv^e geho^ert, iz sei acher oder ho^elz oder wismat, also, daz daz chlo^ester ebichleichen den hof haben schvlle an rechtens aigens stat als ich vnd mein vo^ervodern in c haben gehabt, vnd han daz getan mit meiner havs vro^ewen ver Margareten vnd mines bruder otten vnd mit meines svnes heinreichs gv^etem willen, dj sich vurziht taten als ier rehtes an dem selben hof vnd mit sant mier habent gelobt, daz si des selben hofes des vo^er genanten Chlo^esters gewer schvllen sein vnd swaz schaden daz go^etes havse dar vber nimet an dem selben ho^ef mit rehte, den scho^el ich vnd avch sev, swenne ich niht pin, dem Chlo^ester genzlichen an alle wider rede ab tv^en. Daz dehain chrieg vu^erbaz zwischen dem Chlo^ester vnd mier vnd meinen gerben werd vmbe den selben hof oder vmbe iht, daz dar zv^e geho^ert, so han ich gegeben dem vo^ergenanten gotes havs disen brief mit meinen insigel vnd mit meiner vrevnt jnsigel der volchensto^erfer vnd gib in des gezivg Her Otten von Chrevzzen, Chunraten vnd Heinreichen sinen bru^eder vo^en volchenstorf, Heinreichen vo^en volchenstorf, Chvnraten vo^en Chappelle, Heinreichen vnd Otten vo^en Lo^ensto\erf, Ru^egeren vo\en Hvten, Hern Perihtolden vo°n Hartaim, Her Livtolden vo\en walden, Her Dietreichen vo\en Ebelsperch, Hern Otten Wolfstain, Albrehten vo\en Havzenpach, Seifriden vo°n welichling, Chunraten vnd seifriden vo\en Lanzenperg, Ortolfen vo°n Stadel, vlrichen von Sinzenberch, Ditmaren vnd Arnolt vnd Albrehten die Wolfstain, Heinreichen den Jacober, Siefriden von Grillenberge, Heberharten von hage, wilhalmen von Chrersperge, (sic) Heinrichen von Dietreichinge, Bernharten vo\en ahleiten, Otten zertelein, Heinreichen den Tobler, Dietrichen den walich, Herworten vo°n Chremsdorf vnd dar zv alle, di da bej sint gewesen vnd gesehen vnd geho\eren habent, vnd ist daz geschehen nach vnsers herren gewu^ert vber tavsent jar vnd zway hvndert iar, an dem nevnzkistem iar des mitichen vo\er sant valenteins tag, dv er gimartert wart.

Source Fulltext: OÖUB 4 (Wien 1867) S. 122-123, Nr. 128