Wier Aynweich von Gots gnaden Probst datz sand Florian veriechen vnd tu^en chunt allen den, di nun sint vnd hernach chuftigt werdent, die disen prief sechent oder horent lesen, daz wier ze chrieg sein warden vmb aynn Rayn zwischen vnsers Gotsthaus aygen datz zirtnarn vnd des gotshaus aygen, daz gehart hintz Erlach chloster, vmb den selben chrieg habent vns vnser paider vocht payder gotzhauzer ayn gemezzen tag gegeben vnd derselb tag wart von vns paydenthalben gesu^echt hintz ziertnarn noch Rat vnser vocht hern Eberhartz von walse vnd hern Heinrich seinz pru^eder vnd goben vns die an ierr stat zwen furhairr During von Altenhofen zv den zeiten lantrichter in der Riedmarich vnd Chunraten den Steger zv den zeiten Richter ze mauthausen vnd noch der rat nam wier vns paydenthalben Segs man, vier Pidek vnd zwen Pa^euman, die hie genant sind: Seybot von den wagnern, Hermann den Rigeler von aygelsperg, Chunratn von dem Chelr von zirtnarn, Vlrichen den Piersen vnd Chunraten den hann von zirtnarn vnd sein bru^eder Fridreichen vnd an die segs ward vnser chrieg paidenthalben auz der hant gegeben; di sagt do, daz Meinhart de hofstat, do Tu^ern auf leg, chauft hiet von zwain vrov^en vnd die selb hofstat die leng hiet von dem pach vndz an des herzochen aygen vnd an der prait gieng an des aygen von Chappeln vnd als die nidern Ekk genannt werden an dem Tu^ern vnd waz an den tu^ern gieng ob der strazze, vntz an dez herzogen aygen, die selb hofstat gehart in Meynhartzhof vnd wer vnsers gotzhaus aygen, denn niderthalb der strazz gehart der paungart vnd die wiz zu dem tu^ern vnd nicht mer. daz sagt die segs pey ierr gewizzen vnd pey iern trev^en vad die selben segs, die egenant sind, die tailten des tags alle die hab, die Meynhart lassen het auf Meynhartz chint auf drey svn und auf zwo Tochter vnd auf sein eninchel duringen Teymeis svn vnd tailten den hof sein aynsidel zv veld en drey vnd an der hofmarig enzwai, daz drinttail an dem akker, daz wart in die hofstat gebet pey dem Turn, daz waz ain hof, do ward der iung Meinhart auf getailt, do wart auz disem tail zwen hof, do ward hainrich auf getailt auf ayn hof vnd sein pru^eder Cholhoch auf den andern hof vnd ain lechen datz Po^e niken, daz wart getailt endre in deu drei hof, do der zechent ze Po^eniken, der ward getailt auf seyn Tochter Chunigunden, denn sein Tochter Kadrein die scholten ier pru^eder bestatten von den drin hofen, den duringen Meynhartz eninchel dem waz der Tu^ern gevalen noch seinz vater ta^et vnd noch seinr mu^eter to^et, do wagen daz dez chinst vrevnt, daz man daz chint von der hab nicht geziehen mecht, wann iz nu^er in dem andern iar waz, iz hiet der Tu^ern an dem dienst genueg ze dragen hintz Erlach ann drin silling phennig vnd satz do die drei prueder mit vnser hant Hainrieg vad Cholhoch vnd Meynhart dem Chint irem Ohay\em Duringen ieder man awz seim hof drei ieug achers, das waren nevn ieug ie in daz veld drei ieug vnd last den Tu^ern von Chint mit den ekkern fu^er fu^emffzegen phunt wienner phenning vnd iederman solt seyn ekker lasen fu^er fu^ef phunt, swenn er mecht vnd vmb dieselben phenning tet sich daz selb chint during Teymeins svn fursicht des Tu^erns vnd allez des gu^etz, daz zv vnserm gotzhaus geho^ert, also mit auzgenumern Red, do daz selb chint during an erben sturm, so scholt der Satz auf den ekhern fu^er div fumffzegen phunt gantz vnd gar erben an allen fu^erzu^eg auf Starchcanden dez chintz vetern vnd sein erben vnd habent aug fu^er daz selb chint gelubt du^ering, daz wir furwaz von ym an chrieg gbeleiben, sein Ohaym der egenant durinch von altenhofen vnd sein O^ehaym der schon dietdreich ab dem espan vnd sein veter Starchant. Datz diu red stet vnd vnuercherd von vns beleib vnd aug var vnser mit rechter gewizzen gewandelt sein noch pyderber laut rat, als var versriben ist, dorvmb geb wier disen prief ze aym Sichtchem v^erchunt fu^ersigeldem mit vnserm anhangundem Insigel. dez seynd gezeug vnd gestent die vor genant payd Richter duringchc von altenhofen vnd Chunrat der Steger sev paid mit ier anhangdunen jnsigel. der Prief ist geben, do man zald von vnsers Herren gepuret Tausent jar, zwai hundert iar darnoch in dem Sybenden vnd Neuntzgistem jar An sand Gorgen Tag.

Source Fulltext: OÖUB 4 (Wien 1867) S. 259-261, Nr. 284