Wir ainweich von gotes gnaden Probst, Heinrich Techent vnd all di Samnung datz sant Florians haus veriehen vnd tun chunt mit disem prief allen, di in an sehent oder horent lesen, daz der erber man vnser gaistleich pruder her Wernher auz der alten milich gazzen purger ze Pazzaw vnserm siechhaus ein gvt datz winchendorf ist genant (nichts ausgelassen) im zu einer gehu^egnu^esse vnd zu einem selgeret durch got mit seinem gut hat gechauft vnd geben: Nu hab wir sein andacht, sein lieb, fu^erderung vnd sein staet trewe, di er vns vnd vnserm Gotshaus trowleich vnd furderleich an leit, vol gewegen vnd an gesehen, so ist daz wol zeitleich, daz wir in auch an seinen freunten eren vnd auch furdern, swo wir mugen. So binden wir vns vnd vnser gotshaus darzv mit diser hantvest vnd mit disem prief, daz vnser siechmaister an vnser stat seinen svn wernharten vnd vnserm gaistleichen prvder von der gv^elt des vorgenanten gvtes datz wichendorf schol geben iaerleich ein phunt newer wienner an vnser vrowen tag in der stift vnd zv einer vollung seiner phrv^ent vncz an seinen tod. Wir pinden vns ouch dozzv, daz wir des vorgeschriben hern wernhers von Pazzaw iartag nach seinem tod ewichleich sullen begen mit messen vnd vigilin vnd mit anderm gebet als eines priesters, der auz vns stirbet, vnd swo wir daz versoumen vnd nicht entvn, daz wir der selben phenning alle iar seinem svn Wernharten nicht geben oder wir sein selbs sel nicht laisten, daz wir gelobt haben, so schol der vorgenant her wernher oder sein naechst gerben, swenn er nicht en ist, mit des bischolfs Brief von pazzaw der selben gult sich vnderwinden vnd als lang inne haben, vncz im allez das gebert werd, daz wir versovmt haben, wir wollen ouch daz phunt geltes auf dem ê gesprochen gvt datz winchendorf nach vnsers prvders wernher tod vnserm siechaus schulle dienen farbaz immermer. Vnd daz di gelv^eb, di vor geschriben sint, staet vnd vnczebrochen beleiben, geb wir im disen prief zv einem vrchund versigelten mit vnser beider insigel vnd den zevgen hern vlreichen den erbern probst vnd hern Chunraten von Radek Techent datz sant Nycla pei Pazzaw vnd wernharten des erbern Techents wolkers von pazzaw Schreiber Pharrer von hartchirchen. Der prief ist geben datz sant Florians haus, do von Christ pu^erd ergangen warn Tausent iar, dreihundert iar darnach in dem sechsten iar an dem palm tag.

Source Fulltext: OÖUB 4 (Wien 1867) S. 503-504, Nr. 539