Want got aller gescheph schepher menschlich natur also geschephet hat, daz ir nicht gewizzer ist dann der tot vnd nicht vngewizzer dann des totes zeit, so ist daz pilleich vnd nvtz, daz ein igleich mensch sich gegen des totes zeit warn schol darvmb, daz iz vngewarnt nicht fvnden werd. Davon wir Gvndacher vnd Rv^eger vnd Janse von Storchenwerch vergehen vnd tv^enen chunt an disem prif allen levten, di in lesent oder ho^erent lesen, daz wir mit verdachtem mv^et vnd mit gemainem rat dem Gotzhovs datz sant florian gegeben haben, swaz vrow lieb di scv^elerinne, di Engelpreht liez von Lintz, der der Schv^eler genannt waz, von vns ze lechen hat datz Hlavsmenning mit sogetaner bescheidenheit, daz der probst vnd allev sein samnvng vnser vodern vnd vnser vnd avch vnser afterchvmft da von gedenchen schvllen ewichlich vnd schol man an vnsers prv^eder iar tag hern Gvndachers, der Chorherr da gewesen ist vnd avch da bestatt ist, der Samnvng ir phrunt pezzern mit einem halben phvnt phenning dar vmb, daz man seiner sel dester vleizichleicher des selben tages gedench von der selben gv^elte. So hab wir vns datz dem selben chloster erwelt ein stat, da man vns bestatten schol, da wir enpeiten schvllen des ivngisten tages, vnd habent si vns gelobt nach vnser bet, swann oder swo vnser dheiner stirbet, daz si des leichnam da nemen schvllen vnd pringen zv irm chloster vnd chv^ellen in da erleich bestatten. Also schol man vns allen drin tu^en. Man schol avch an vnserm iar tag ewichlichen den herren vnd der samnvng ir phrv^ent pezzern mit Zwain phvnten phenning von der vorgenanten gvlte. Dar zv schol man des selben tages opfern ein halbes phvnt phenning auch von der selben gvlt den priestern, di da messe sprechend Geschieht awer hin nach, daz daz selb vnser gescheft an chafth not versaumet oder nicht volendet wirt, als gelobt ist, so schol der eltist gerb, der dann vnder vns ist oder nach vns chvmftich ist, der vorgenanten gv^elt datz Havsmening sich vnderwinden vnd so lange inne haben, datz di savmvng gepezzert werd. Swann awer di savmvng gepezzert wirt, so schol der selb gerb oder di andern gerben fvrwaz nicht mer mit dem selben gv^et ze schaffen haben. Wer awer daz, daz der selb gerb nach pezzervng daz selb gvet nicht gern dem gotzhovs wider antwurten wolt, so schol der probst, der dann ist, seines vogt rat vnd hilfe dar vmb sv^echen. Daz ditz dinch stet vnd vnverchert beleib, so geb wir dem gotzhavs disen prif versigelten mit vnser aller dreier insigil ze einem vrchv^end ewichlichen. Ditz dinch ist geschehen, dv vergangen warn von vnsers herren pvrd Tavsent iar vnd drivhundert iar, dar nach in dem siebenten iar an sant Margreten tag.

Source Fulltext: OÖUB 4 (Wien 1867) S. 529-530, Nr. 570