Ich Chalhoch Meinhartes svn von Cirtnarn vergich vnd tv^en chvnt an disem prif allen levten, di in an sehent oder ho^erent lesen, daz ich mit meines herren Probst Aynweiges von sant florian gv^etem willen meiner hovsvrowen vrovn Chvnegvnten hern Heinrichs tochter des Rigler gesetzet han ein dritteil an dem hof datz Cirtnarn vnd ein dritteil des Cehentes avf des gu^eten gesellen hof vnd ein dritteil des Cehentes auf dem Swainpechen hof vnd ein dritteil an dem lehen datz Ponik vnd ein halbes lehen in dem neste vmb achtzk phvnt phenning wiener mvnsse fvr ir Morgengab mit sogetaner bescheidenheit, ob ich an gerwen vervar, so schol mein prvder Meinhart daz selbe gv^et levsen vmb di selben achtzk phvnt phenning in vier iaren; wer awer daz, daz mein prvder Meinhart nicht gelevsen mecht in vier iaren von meiner hovsvrowen, so schol der Probst, der danne herr ist datz sant florian, daz vorgenant gv^et datz meiner hovsvrowen vrown Chvnegvnten levsen vmb di vor genanten phenning, ob iz im wol gevellet. vnd want ich nicht aigens insigel han, so han ich gepeten die erwern herren hern Heinrich von volkenstorf vnd hern Chvnraten von Chappelle, daz si daz geschefte vnd den satz bestetigt habent vnd gevestent mit ir paider insigeln. Des sint zivg her Heinrich von volkenstorf, her Chvnrat von Chappelle, her Rv^eger von hv^ett, her Perchtolt von hartheim, her Espen der amman, vlrich der Chraier, Herbort der Chremsdorfer, willhalm vnd wolfhart vnd fridreich di Chersperger, Ditrich von prvk, Hertweich von Gavgenperg, Rv^eger von pernaw vnd ander frvm levt, den iz chvnt getan ist. Diser prif ist gegeben, dv von vnsers herren pvrd vergangen warn Tavsent iar vnd drivhvndert iar, dar nach in dem sibenten iar an sant Merteins tag.

Source Fulltext: OÖUB 4 (Wien 1867) S. 537-538, Nr. 577