Ich Ortolf der Aspech vnd mein hovsvrove vrove Ofmey tven chvnt mit vrchvnd ditz briefs allen den, di in an sechent oder horent lesen, di nv sint oder her nach chvmftig werent, daz wir mit verdachtem mvet vnd gveten willen vnser chind, di wir zten zeiten mit ain ander heten, Hermans, Margreten, Elizbethen, Perichten, Kathereyn vnd mit vnsers bruder gvnst vnd seiner chind witiges, mit dem wir ze vuerzicht getailt heten, vnd mit ander aller vnser vriunt vnd erben rat vnd gveten willen dem erbern herren Probst Hainrichen vnd der Sammvng ze sand florians havs ze chavfen haben gegeben vnsern hof in der Te\ann mit samt der Mv^el vnd mit alle dem, daz dar zv geho^ert an aecher, an wismat, ze holtz vnd ze veld, pavn vnd vngepavn, versvecht vnd vnversvecht, swi iz gnant ist, mit allen nvtz vmb sechs vnd sibentzig phvnt phenning wienner mvnz vnd sein auch der phenning schon vnd gentzlich gewert. Iz schol auch daz vorgnant gotshaus datz sand florian den selben hof ewichlich inn haben allez vuerzog in rechter vnd stiller aigens gwer, als wir in vnd vnser vodern her pracht haben vnd sein avch des egnanten gotshaus des selben hofs gewer mit aller der ste\atigung, als wir ze reht schvllen. Vnd daz den vorgnanten gotshaus dehain chrieg oder chain ansprach vuerbaz von vns oder von vnsern erben oder von ieman icht auf ste, haben wir im disen brief ze ainer vesten bestetigvng gegeben bewart vnd versigelt mit hern Eberharts jnsing (sic) von Walse, des Oberisten Lantrichter ob der Ens vnd hern Hainrichs des Eltarn von volchenstorf vnd hern Albers vnd hern Hadmars von Chrevtzen vnd hern Hainrichs des jung von volchenstorf, in der gericht der selb hof leit, wan wir selb nicht aigens jnsigel heten. Di vorgnanten herren sint auch der wandlung zivg mit andern, di hie geschriben stent: her Hainrich von Lonstorf, Heinrich, Ott, vlrich sein svn, her Ott von Ens sein brueder, her Seibot von volchenstorf, her Espein von Hag, Dietmar von Aistershaim, Herwort von Chremstorf, Ott von Perchaim, Meinhart von Sintzenperg, Dvrinch der Hager, Hertneit der Chreslinch, friderich der Stadler, Seifrid vnd Ott von weliching vnd ander biderb levt, den iz chvnt vnd gewizzen ist. Di sach ist geschehen in dem vorgenanten gotshaus Nach vnsers herren gebverd vber drevzehenhvndert iar, dar nach in dem sibenzehentem iar an sand florians tag.

Source Fulltext: OÖUB 5 (Wien 1868) S. 190, Nr. 192