Ich Wernhart von Mezzenpach fuergich vnd tuen chunt allen den, die disen prief lesent oder horent lesen, daz ich mit fuertachtem muet vnd mit guetem willen vnd meiner hausvroben vroben Gedrauten vnd aller meiner erben gunst vnd willen han gesatzet meinen Weingarten ze Tyrnstain, der da haizt der hofinger, Petrein in dem Tawe ze Lintz, Kathrein seiner hausvroben vnd allen seinen erben vmbe suben vnd zwainzk phunt phenning alter wienner muniz mit also buschaidener rede, wenne ich die vorgenantten suben vnd zwainzk phunt penning nu zv dem naesten faschange vber ein iare nicht gebe, so schol sich der êêgenante Weingart fuer fallen haben also wuschaidenlich, waz im die vier manne, die hie geschriben stent, hin zv haizzent geben, her Wernhart an dem vruar, vnd her Her Hainrich an dem vruar vnd her Symon der Mautter vnd Fridrich der Tungozzinger vnd auch disev zvgabe schulle wir baide stet haben. Wer auer, (daz) diserr erberr manne einer nicht were, so schulle wir ein als erbern purger ze Lintz an sein stat nemen. wer auer, daz er den vorgenanten weingarten wolt losen, das schol er mit seinem aigen guet tuen; wolt er in auer fuer chauffen, so schol er in mich des ersten an pieten vnd schol ich im den vorgenanten weingarten nach der erbern leut rat, die hie vor geschrieben sint (etwas ausgelassen) vnd pin auch des weingartes sein gewer vnd sein scherm, als Lants recht ist. vnd daz auch disev rede also stet beleib vnd vnfuercheret, gib ich im disen prief fuer sigelt mit meim hangunden insigel vnd sint auch des gezevge her Wernhart an dem vruar vnd her Heinrich sein prueder vnd her Symon der Mautter vnd Fridrich der Tungozzinger vnd vlrich der Liebnawer vnd Mathe der harnbast vnd Heinrich der zvegabe vnd Jans der schreiber vnd ander pider leut. Der prief ist geben, da von Christes geburde waren ergange Tausent jar, drev hundert iar, darnach in dem achtzehentem iar an vnser vroben tage der Schidunge.

Source Fulltext: OÖUB 5 (Wien 1868) S. 227, Nr. 230