Ich Graf Hainreich von Schawnberch vergich offenleich mit dem brief allen den, die in sehent oder ho^ernt lesen, daz fu^er mich chomen sind die erbern herren von sand Florian vnd vlreich der Geltinger, der hat in vnd dem Gotshaus datz sand Florian gegeben mit verdachtem mu°t vnd mit Rat vnd willen seiner Hausfrawen ver Margreten vnd aller seiner freunt vnd erben ein Gu^et datz Praitenaich mit allen vnd darzu geho^ert ze holtzz vnd ze veld, gepawn vnd vngepawn, versu^echt vnd vnuersu^echt mit allem nutzz, swie ez genant ist, vnd sunderleich einen akcher darzu, von dem man acht hu^ener dient, ze widerwechsel vmb ein gu°t, daz daz Gotshaus gehabt hat ||
datz Grieking, vnd swo fu^erbaz dhain chrieg oder ansprach dem vorgenanten Gotshaus vmb den geschriben wider wechsel von dem vorgenanten Geltinger, von seinen erben oder von ander yemant auf ste, dez iz schaden na^em oder arbaitt gewunne, daz schullen si haben auf dem Hof ze Gelting, den er hat, vnd auf alle den vnd er in dem Land hat, vnd schol daz phant sein des vorgenanten Gotshaus mit willen seiner hausfrawen der vorgenanten vnd aller seiner Erben. Vnd daz die wandlung sta^et vnd vnzebrochen beleib vnd vest ewichleich, dar vber gib ich disen brief ze einem sichtigen vrchu^end dem egenanten Geltinger jnsigel, des deu wandlung ist, mit den zeugen, die hie benant sint, her Ru°dolf der Schiuer, her Sighart von Gru^eb, her Aspein von Hag, Otakcher der fu^erter, Rudolf der Schiuer, Leutolt von Chirichperch vnd ander piderb lau^et, den ez chunt vnd gewissen ist. Der brief ist geben do von Christes gepu^erd ergangen waren, Dreutzehen hundert iar vnd darnach in dem achczehenten iar datz sand Florian an dem Sunibentt tage.

Source Fulltext: OÖUB 5 (Wien 1868) S. 222-223, Nr. 226