Reuerendo in christo patri et domino Hainrico venerabili preposito Totique honorabili Collegio domus sancti floriani Canonicorum Regularium ordinis sancti Augustini Patauiensis diocesis Fridericus dei gratia Abbas Totusque Conuentus Monasterij in Chrems-Mu^enster Ordinis sancti Benedicti diocesis iam prefate cum oracionibus sinceram et fraternam in domino caritatem. Cum inter vestram et nostram Eeclesias seu uos et vestros ac nos et nostros bone memorie predecessores a longe retroactis temporibus singularis familiaritatis et amicicie vigor viguerit vigorosus, profecto non absurdum censetur immo consonum racioni, ut qui corporalibus plerumque solacijs nos hactenus fouimus et fouemus, spiritalibus eciam et specialibus suffragijs et fauoribus nos mutuo foueamus. Ea propter, quia, prout gratanter audiuimus, vestre insedit beneplacito voluntatis, vt specialis confraternitatis vnione perfectius vniamur, eandem nobiscum sub forma contrahimus infrascripta concedentes vobis vniuersaliter singulis et singulariter vniuersis ex nunc in antea tam presentibus quam futuris specialem et perfectam confraternitatem siue participationem et communionem plenariam omnium bonorum, que in nostro fient Monasterio et in diuinis officijs, Missis videlicet, vigilijs, orationibus, abstinencijs, elemosinis ceterisque pijs ac deo placitis operibus quibuscunque. Insuper quocienscunque nobis alicuius fratrum vestrorum fuerit obitus nunciatus, compulsatis ex more campanis agetur in nostro Monasterio pro ipsius requie officium defunctorum et mane missa publice in conuentu et tres missas dicet ex nobis quilibet sacerdotum et vnum psalterium quilibet ministrorum (?) et illiterati singuli dicent cum Aue Maria ter quinquagies pater noster suscipientes tres corporales nichilominus disciplinas . preterea semel in anno post dictam dominicam: Domine in tua — proxima vacante feria pro omnibus fratribus defunctis generaliter aput vos in vestra ecclesia et aput nos in nostro Monasterio agetur commune officium defunctorum tam in vigilijs quam in missis . de beniuolencia quoque adicimus speciali, vt, quando vos domine Hainrice nunc preposite venerande fueritis de corpore euocatus, tantum fiet aput nos pro requie anime vestre, quantum pro vno fratrum nostrorum conuentualium in vigilijs, disciplinis et xxx. missis fieri est consuetum . vt autem confraternitatis prelibate inita pactio indissolubiliter et perpetuo perseueret, presentem paginam conscribi et contradi vobis fecimus sigillorum nostrorum munimine roboratam petentes, ut aliam forme consimilis seu tenoris nobis viceuersa velitis transmittere sigillorum vestrorum karacteribus insignitam. Datum in sepedicto Monasterio nostro Chremsmu^enstrensi anno domini Millesimo CCC. XVIII. IX. kalendas Junii.

Source Fulltext: OÖUB 5 (Wien 1868) S. 217-218, Nr. 220