Ich Marchhart der Czeller vnd ich Alhait sein honsvrow vnd all vnser erben veriehen vnd tven Chunt allen den, di disen prief sehent oder ho^erent lesen, daz wir mit wol bedachtem muet ze der zeit, do wir iz wol getuen mochten, dem erbern herren Probst Heinreichen vnd dem Gotzhous datz sand, Florian vnser hueb datz Vrenleiten, di vnser rechtes Lehen von hern Eberharten von Walse ze den zeiten Lantrichter ob der Ens gebesen ist, von dem ouch der vorgenant her di aigenschaft gebunnen hat, ze Chouffen gegeben haben mit allen den Rechten, vnd dar zue geho^ert, versuecht vnd vnuersuecht vmb zwainzg pfunt wienner pfenning, der wir ganz vnd gar gericht vnd gebert sein mit so^ettaner beschaidenheit, daz der vorgenant herr der Probst datz sand Florian di vorgenanten hueb leihen schol mir vnd allen meinen erben zu allem dem Rechten, vnd ander dez Gotzhouses leut lehen von dem Gotzhous habent. Vnd schu^elle wir ouch von der vorgenanten hueb dienen alle Jar an vnser Vrowen tag sechs schilling Newer pfenning vnd dar nach an sand Merteins tag sechs schilling pfenning. Daz di wandlung stet vnd vnuerchert beleib, dar vber gib ich Marchhart der Czeller disen prief bestetigt mit meinem Insigel vnd mit meins Swagers Wilhalms dez Chersperger Insigel vnd zu einer Pessern sicherhait han ich gepeten hern Eberharten von Walse, daz der sein Insigel zu einem zeug dar an gelegt hat. Der prief ist geben nach Christi gepuerd vber dreuzehen hundert Jar in dem siben vnd dreiskisten Jar an sand Bartholomes Tag.

Source Fulltext: OÖUB 6 (Wien 1972) S. 247f., Nr. 242