Ich Hainreich der Jung Eb datz Arnsdo^erf vnd mein Housurowe Tu°et veriehen offenleich an disem Prief vnd tu^een chunt allen den, die disen Brief an sehent oder ho^ernt lesen, di nu lebent vnd her nach chunftig werdent, Daz ich vnd mein Housurow vnd vnser Erben ze der zeit, do wier ez wol getu°en mahten verchauft haben auf vnserm ledigem weingarten, der da gelegen ist datz Arnsdo^erf datz der Lawben an dem Puechaimer vnd haizzet der Muezzchleich, ein ewigez phunt geltes dem erbern vnd dem beschaidem manne Hern Dietreihen ze den zeiten Rihter datz Jbs vnd seiner Housurowen vran Katreyn vnd iren Erben oder swem sew ez schaffent oder gebent vrn ein gu^eet, des wier von in gantz vnd gar gewert sein. Wir schullen im auch daz ê genant phunt geltes aller ja^erichleihen dienen an sand Marteinstag, in oder swem sew ez schaffent oder gebent. Wa^er aber, daz wier daz versa^ezzen, daz wier an sand Marteinstag daz vorgenant phunt geltes niht enga^eben, so ist ez des nasten tages dar nach sehtzig phenning ze wandel. Darmit stet dienst vnd wandel sechs wochen, so wiert danne daz wandel sechs schilling. Geit man danne niht dienst vnd wandel, so zwispildet sich dienst vnd wandel in einem Jar, vntz sich der vorgenant weingart veruellet, vnd swer danne ze den zeiten des ê genanten aygens Rihter ist, der sol danne den vorgenanten la^eutten oder swem sew ez schaffent oder gebent, den vorgenanten weingarten inantwu^eerten an furbot, on chlag vnd on allez reht. Wolt aber sein danne, der ze den (zeiten) Rihter ist, niht entu^een, so sol ez tuen mein Herr von Chunring oder swer danne der obrist Vogt ist, oder swen er danne an seiner stat dar zue schaffet, swanne er den Brief ansieht. Vnd daz in daz sta^et vnd vntzebrochen von vns peleib, dar vber gib ich vorgenanter Hainreich der Jung Eb disen Brief versigelten mit meinem anhangundem Insigel vnd mit des erbern Herrn Hern Hainreihes von Chuneswisen, ze den Zeiten phleger vnd perchmaister des vorgenanten weingarten Insigel. Der Brief ist auch geben, do von Christi gepu°erd ergangen warn drewtzehen Hundert Jar vnd dar nach in dem newn vnd dreyzgistem Jar des suntages in der andern vastn Wochen.

Source Fulltext: OÖUB 6 (Wien 1972) S. 289f., Nr. 286