Ich Chunrat der Flander purger ze Wesendorf vnd mein Hausvraw Elspet vnd Ich Ott der Silberchnoll vnd mein Hausvraw Elspet Wir veriehen an dem prief vnd tuen chunt alln den, di in an sehent oder horent lesen, daz wir an gesehen haben chrancheit dez gegenbürtigen lebens vnd notdurft der sel, vnd mit wol verdachtem muet ze der zeit, do wir ez wol getuen mochten, gestift vnd gewidempt haben ein ewigs selgret Hintz der pharr ze sand Michel mit dez erbern Herren gunst Hern Heinrich zden zeiten probst datz sand Florian vnsern seln vnd alln vnsern vodern selln Allso weschaidenlich, daz man vns ewichlich all wochen sol zwo Mess sprechen auf sant Nyclas Alter ze sant Michel, aine an dem Me°ntag vnd aine an dem vreitag vnuerczogenlich tze gedenchnu°sse vnsern seln vnd alln, di vns zue gehorent Vnd haben auch wir zu dem vorgenanten selgraet geschaft vnd gegeben zwen weingarten, ain vnder dem hochrain haizzet schiezzenperger, do man von dint tze purchrecht fu^enftzehen phenning in dez Groetschans Lehen, vnd ain haizzet daz Schutel, da man von dint zu purchrecht fu^emf phenning in Ekchharts Lehen, Vnd ain phunt geltes, daz Seifrid datz sand Michel dint von aim weingarten in dem Tobental an sand Merteins tag, vnd geit er dez phuntez nicht an dem selben tag oder innr vierzehen tagen dar nach, so hat sich der weingart dem pharrer veruallen. Vnd ain halphunt geltez, daz Hainrich der Neuhaker dint von aim halben Lehen, haist an dem Anger, an sand Merteins tag oder inr vierzehen tagen darnach; geschech dez nicht, so hat sich daz halb lehen auch veruallen dem pharrer, vnd ain halphunt geltez auf aim Weingarten, haizzet Hochrain pei Wesendorf, dar zue geben wir vier phunt beraiter phenning dem erbern Herren hern Vlrich zden zeiten pharrer ze sand Michel, di sol man auch anlegen zu dem selben selgret, daz iz dester paz gestift werd Allso mit ausgenummer red, swenn daz ist, daz di zwo vorgenanten Mess nicht gehabt werdent in einer igleichen wochen, dez got nicht engeb, so sol, swer den prief inn hat, sich der zwair vorgenanten weingarten vnder ziechen vnd der zwair phunt geltez, di vor geschriben sint, vnd swer zu den Zeiten pharrer ist, der sol di vier phunt wider chern vnd sol man di selben vier phunt vnd de zwai phunt geltez geben in daz Spital datz Chrems, vnd di offt genanten zwai phunt geltez tailn vnder de siechen, von aim hincz dem andern, alls verr si geweren mogen. Daz dem êgenanten gotshaus ze sant Michl dicz geschaeft vnd daz selgraet allso staet vnd vnuerchert beleib, allso vor geschriben ist, dar vber geben wir disen offen prief versigelten mit vnsers genaedigen Herren hern Leuttoltez von Chunring vnd mit dez erbern Herren hern Jorgen zden Zeiten pharrer ze Mu^elbach anhangunden jnsigeln, wand wir aigner insigel nicht enhaben. Der prief ist geben nach Christ gepurd vber dreutzehen Hundert jar, dar nach in dem vier vnd vierzikisten jar An sant Kathrein tag.

Source Fulltext: OÖUB 6 (Wien 1972) S. 496f., Nr. 493