Ich Agnes Herrn Charlein des Rech von Lufftenwerch wittib, dem Gott genadte, vergich vnd thuen khundt allen den, die nu sint vnd hernach khünfftigkhlich werden, die disen brief lessent vnd sechent oder hörent Lössen, daz ich mit wolbedachtem mueth vnd auch mit guetem willen mein vnd aller meiner Erben han ich recht vnd redlich zu khauffen gegeben der Erbarn Frauen Elsspeten der Seisterinne meinen dienst zu zwainzig Mezen Waiz, die man ihr alle Jahr gethreulich diennen scholl vnuerzogentlich an vnser Frawentag ze der diennstzeit von meinem Guett Ab dem Strenwerge, da Wernhardt von Möring aufsiczet, Vnd war daz gethonn, daz ich oder mein Erben daran seumich warn, wie daz kheme, daz der dienst An dem vorverschriben tag nicht geben wurde, So hat die vorgenant Fraw des Gewalth vnd auch Recht, daz Sie Fraw Elspeth auf dem egenanten Guett dacz Möring scholl pfendten Alss vere, daz si ires davon bekhömen mag vnd scholl auch der diennst von demselben holden an der Frawen müehe hintz Pulgarn gefierth vnd auch gewert werden in dem Casst Metzen von Lufftenwerch. Vnd souil mehr, wenne ich oder meine Erben der egenanten Frauen Frauen Elspeten geben in der Zeit zwischen Osstern vnd St. Georgentag acht Pfundt Wiener Pfening, So ist der diennst von der Frauen ledig vnd loss an allen füerhrzug. Vnd wer daz gethon, daz die egenant Fraw Elspeth nicht enwere, Swer mich denne mont mit dem brieff mich oder mein Erben, demselben schullen wir alles des gebunden sein dez Rechts, vnd vor verschriben ist. Daz die rede Stett vnd vnuerkhert bleib von mir vnd von meinen Erben, darvber so gib ich die vorgenant Agnes disen brieff zu ainem wahrn Urkhundte versiglten mit meines Sunes Peter dez Rechs Innsigl vnd mit meines brueder Vlreichs des Siczendorffer Innsigl Also mit ihr baider Anhangenden Insigl, wand ich selber nicht aignes Insigl han. Der brieff ist geben, da man zehlt von Christes gebuhrdte dreyzechenhundert Jahr vnd darnach in dem Sechs vnd Vierzigisten Jahr an St. Peters tag.

Source Fulltext: OÖUB 6 (Wien 1972) S. 555f., Nr. 549