Ich Chünrat von Lawe genant, Pfarrer dacz sand Marein Chirchen, di nahen leit bey Euerding, vergich vnd tun chund, daz ich meinen hof ze O^etnu^esch, der nahen leit bey Aystershaim, der mein vreyes aygen ist vnd mich ze rechtem eribtail an gevallen ist vnd geruet an allen chrieg in nucz vnd in gewer han gehabt manigew jar, den han ich geben meinen erbern herren datz sand Florians haw^es mier vnd meinen vodern ze einem selgeraet also beschaidenleich, swann di nächsten erben cho^emen, mein bru^eder Toman oder sein su^en Chu^enrat vnd Alber, den schu^ellen mein vorgenant herren ze lo^esen geben denselben hof genaediehleich nach ir beschaidenheit; nu sint cho^emen di nachsten erben Chu^enrat vnd Alber meinez bruder Tomans su^en vnd habent den gelediget vnd gelo^eset vmb zwainczig phunt wienner phenning, di in gelihen hat her Heinrich von Aystershaim auf denselben hof vnd hat sew bayd genomen an holden stat auf den selben hof also, daz sew den dienst, der da von geho^eret, all jar iem geben schu^ellen als lang, vncz daz sew den lo^esen vmb di vorgenanten zwainczig phunt wienner pfenning. Ich offen auch, daz ich vnd mein herren, di vor genant sind, den hof gehabt haben in nucz vnd in gewer geruet mer dann dreyzzig jar. Daz di red vnd Wandlung staet beleib, dar v^eber gib ich disen brief meinen vorgenanten herren datz sand Florians haws ze einem vrchu^end, der bestaett ist mit meinem insigel vnd mit meines vetern insigel hern Hainrichs von Lawe, meines verwesaer dacz sand Marein Chirchen vnd mit hern Otakers Lerwu/'ler insigel vnd mit hern Hainreichs insigel von Aystershaim. Der brief ist geben, do man zalt von Christes geburd dreuczehen hundert jar, darnach in dem syben vnd vierczigstem jar an vnser wrawen tag ze der Liechtmess.

Source Fulltext: OÖUB 7 (Wien 1876) S. 2f., Nr. 2