Ich Hertneid von Chvmpolting vnd Elleis mein Hausvraw vnd all vnser Erben vergehen und tuen chvnt daz wir zway guet, gelegen an dem Vierstperg in Veldchirher Pharr, die vnser vreis aigen gewesen sind vnd de vns geben hat Ulreich der Prveler ze rechtem heyrat guet vnd da wir auf getailt sein ze rechtem erbtail mit furzicht aller erben, di selben guet haben wir gegeben ze chauffen dem ersamen Gotshaus datz sand Florian vmb zwai vnd zwainzig phunt vnd sechs schilling gaewiger wienner phenning, der wir gantz vnd gar gericht vnd gewert sein. Daz die Wandlung also stêt vnd vnuerchert beleib, dar vber gib jch vorgenanter Hertneid disen prief versigelt mit meim jnsigel vnd durch einer pezzern Sicherheit wiln zv eim gezeug mit hern Pylgreims dez Walchs jnsigel vnd mit Albers dez gnevsen jnsigel vnd mit Nyclas des Mvldorfer jnsigel. Der geben ist nach christi gepurd dreutzehen hvndert jar, darnach in dem syben vnd vierzkistem jar an vnser Vrawn tag zder Liechtmisse.

Source Fulltext: OÖUB 7 (Wien 1876) S. 6f., Nr. 6