Gotfridus dei gratia Patauiensis episcopus omnibus christi fidelibus in perpetuum. Qvia magna est coram deo fidutia elemosina omnibus facientibus eam, ipsa namque dei extat ancilla, mortis antydotum, iter salutis, venie porta, ipsa etiam peccata elemosinis redimuntur, estque impietas super fratre claudere viscera pietatis, Et obinde beatus, qui intelligit super pauperem et egenum. Hoc sane attendens Venerabilis in christo Heinricus prepositus monasterii sancti Floriani ordinis sancti Augustini, canonicorum regularium nostre dyocesis, qui de elemosinis et subuentionibus factis ipsius conuentui et monasterio suo predicto, ex largitione, donatione testamentis seu legatis christi fidelium clericorum et laycorum celestes thesauros congregans, hospitale quoddam infirmorum ante valuas cenobii sancti Floriani construxit, sufficienter dotauit ac per manus nostras vtinam deo gratas consecrari procurauit, certum ibidem infirmorum numerum et laborare non valentium cum certis prebendis in victu et vestitu ceterisque necessariis et tribus missis perpetuis ibidem cottidie celebrandis instituens, cum certa bonorum et possessionum comparatione et ipsarum nominali expressione, ordinatione, administratione aliisque omnibus, que in legali, iusta, pia et deuota fundatione sunt attendenda, sicut in eiusdem prepositi et conuentus sui litteris inde confectis vberius continetur. Nos bonorum operum, que in dicto hospitali exercentur, quorum gloriosus est fructus, participes effici desiderantes, ipsum hospitale consecrauimus, ac fundationem, dotationem, missarum ordinationem, infirmorum procurationem et omnia alia in litteris dicti prepositi et conuentus contenta, sicut prouide facta sunt, rata habemus et grata, confirmantes ea patrocinio huius scripti, nostri et venerabilis capituli nostri sigillis pendentibus roborati, addicientes, vt nullus prepositus sancti Floriani vel ipse conuentus seu quisvis alius vllis umquam temporibus predictam ordinationem in toto vel in parte infringere audeat vel ei ausu temerario contraire. Siquis autem hoc attemptare presumpserit, indignationem omnipotentis dei incurrat, et nostram ac successorum nostrorum seu capituli nostri punitionem et seueram castigationem eidem infligendam habeat merito formidare. Datum Patauie anno domini millesimo tricentesimo quadragesimo nono, V/to idus septembris.

Source Fulltext: OÖUB 7 (Wien 1876) S. 133f., Nr. 134a