ICH Anndre zw Haderstorff vnnd ich Cathrey sein haussfrau vnnd vnser erben wier veriechen vnnd thuen khundt allen den, die den brieff sechent oder hörent lesen, die nun lebent oder hernach khunfftig werdten, das wier mit wolbedachtem muett vnnd mit gesambter hanndt aller vnnser erbenn vnnd nach vnnser pesten freundt rath vnnd gunst vnnd zu der zeitt, da wier es woll gethuen mechten, recht vnnd redlich geben haben vnserm sohn hern Wildung zw Pulgarn jnn dem khloster ain pfundt pfening ebiges gelts wienner muntz auf vnnserm ledigen vnuerkhumertten paungarten, der da leitt zu Hadrinstorff enhalb der pruckh zunagst Geueller paungärten, vnnd hab in auch das darzue bestädt mit meiner hanndt, wann ich sein selb perckhherr bin. wier sollen auch jm das vorgenandt pfundt pfening gelts diennen zu zwayen tagenn jnn dem jahre, ann sanndt Marteinstag ain halbs pfundt vnnd an sanndt Jorgenstag ain halb pfundt, ich vorgenanter Anndre oder mein erbenn oder wer den paungartten nach vnnss jnne hatt. dätt wier des nicht, so verfält sich wanndel darauf, alss purckhrechts recht ist in dem lant zu Osterreich, vnnd nach meines sohns dotte sollen wier ez dennoch ebigclich zu dem khloster zu Pulgarn diennen mit allem dem rechten alss vnnserm ehegenanten sohnn darumb, das sy seiner seell vnnd vnnser voruordern seilen ebigclichen gedennckhen. vnnd das auch die red füerbass stätt vnnd vnzerbrochen beleibe, darüber so gib ich ihm obgenanndter Anndre disen brieff versigelt mit meinem jnnsygel vnnd mit des erbaren herrnn jnnsygel herrn Jörgen der zeitt schaffer jn dem khloster zu Pulgarn. Der brieff jst gebenn zw Bartholomej nach Christy gebuerth dreytzechenn hundert, darnach jnn dem neun vnnd viertzigistenn jahren.

Source Fulltext: OÖUB 7 (Wien 1876) S. 125, Nr. 127