Ich Vlreich der Chaiser vnd mein hausfraw ver Christein vnd all vnser erben, di wir haben oder noch gewinnen, veriehen vnd tu^en chunt offenbar an disem prief allen den, di in sehent oder horent lesen, die nu sind oder hernach chumftig werdent, daz wir mit wolbedachtem mut vnd nach rat vnd gunst aller vnserer vreunt vnd besunderlich Hertneides meins pru^eder vnd seiner hausfrawn ver Sophein vnd allrer irer erben, di si habent oder noch gewinnent vnd meins swager Jasen (sic) dez Scheken von Styr vnd seiner hausfrawn ver Agnesen vnd aller irer erben, di si habent oder noch gewinnent, gutleichem willen verchauft haben recht vnd redlich zu der zeit, do wir iz wol getu^en mochten, vnsrev gu^et dacz Erleich vnd sint gelegen ze Nezzepach, di vnsers vaters hern Heinrichs des Chaisers, dem Got genad, vreiz aigen sint gewesen, vnd sint mich an geuallen an rechtem tail von meinen vorgenanten geswistreden mit alle dev, vnd dar zu^o gehort ze holcz, ze veld vnd ze wismad, gestipft vnd vngestipft, versu^echt vnd vnuersu^echt, wie iz sei genant, mit allen nuczen vnd rechten, als wir sev haben inn gehabt, dem ersam gotshaus dacz sand Florian vnd besunderlich dem spital da selbs vmb achczich phunt wienner phenning, der wir gancz vnd gar verricht vnd gewert sein. Wir veriehen auch vnd schollen der vorgescriben gu^et vnd alle dev vnd dar zu^e gehort, gewer sein vor recht an aller stat, wo des dem egenanten gotshaus dacz sand Florian vnd dem spital da selbs durft geschiecht nach landes recht. Naem auer daz oftgenant gotshaus vnd daz spital dhainen schaden daran, den schullen wir in ablegen vnd widercheren gancz vnd gar. Swo wir in dez ab giengen, daz schullen si haben auf vns vnd auf vnsern erben vnd allrer vnserer hab, di wir haben in dem Lant ze O^esterich. Wer auer ieman vnter vnsern erben oder nachchomen, di recht wolten haben an den vorgenanten gu^eten vnd dar nach sprechen, der schol dem oft genanten gotshaus dacz sand Florian vnd dem spital da selbs geben czwai hundert phunt winner phenning, vnd schol sich der gu^et vnterwinden vnd schol dann (daz) gotshaus vnd daz spital dar auf nicht mehr haben ze sprechen. Vnd daz disev wandlung vnd der chauf, als vor gescriben staet, ewichleichen sta^et vnd vnuerchert beleib, dar vber gib ich vorgenanter Vlreich der Chaiser disen offen prief versigelten mit meinem vnd meins pru^eder Hertneits vnd mit meins swager Jansen dez Scheken von Styr anhangunden jnsigeln. Vnd durch pezzer sicherhait dem oftgenanten gotshaus vnd dem spital haben wir dienstleichen gepeten den erbern vnd wirdigen herren hern Ewerharten von Walsse, hauptman ob der Ens vnd vogt dez selben gotshaus, daz der sein jnsigel dar an hat gelegt zu einem ewigen geczeug der vorgenanten wandlung. Der prief ist geben nach Christ gepu^erd dreuczehen hundert jar, dar nach in dem fumfczikisten jar an sand Mathias tag.

Source Fulltext: OÖUB 7 (Wien 1876) S. 176f., Nr. 174