Ich Vlreich der Chremsdorfer vnd ich Albrecht, Ru^egers sun des Chremsdorfer vnd all vnser erben veriehen vnd tu^en chunt offenbar an disem prief allen den, di in sehent oder horent lesen, daz wir mit wol bedachtem mu^et, mit gunst vnd mit rat aller vnser vreunt vnd erben verchaufft haben zder zeit, do wir iz wol getu^en mo^echten vnser gu^et vnder der Linden pei der aw in Lewntinger pfarr, daz vnser vreys aygen ist gewesen, gechaufft von dem ersamen gotshauz ze Wilhering, mit alle dew, vnd dar zu gehort ze holcz, ze veld vnd ze wismad, gestifft vnd vngestifft, versu^echt vnd vnuersu^echt, mit allen rechten vnd nuczen, als wir iz haben inn gehabtt, dem ersamen gotzhaus dacz sand Florian vmb vier vnd zwainczik pfunt pfenning wienner mu^enzz, der wir gancz vnd gar gericht vnd gewert sein. Wir su^ellen auch dez vorgenanten gu^etes vnd alle dew, vnd dar zu geho^ert, gewer sein vor recht an aller stat, wo dez dem egenanten gotzhaus dacz sand Florian du^erfft geschiecht nach landes recht. Na^em auer daz oft genant gotzhaus dacz sand Florian dhainen schaden dar an, den su^ellen wir im ablegen vnd wider cheren gancz vnd gar. Swo wir im dez ab giengen, daz sol ez haben auf vns vnd auf vnsern erben vnd auf aller vnsrer hab, wo wir di haben in dem lant ze O^esterreich. Vnd daz disew wandlung vnd der chauf, als vor geschriben stet, ewichleich sta^et vnd vnuerchert beleib, dar vber geben wir disen prief versigelt mit meinem dez vorgenanten Vlreichs dez Chremsdorfer anhangundem insigel, vnd wand ich vorgenanter Albrecht, Ru^egers sun dez Chremsdorfer nicht aigen insigel han, han ich vreuntleich gepeten meinen liben swager Hainreich den Fleischezz, daz er sein insigel auch daran gehangen hat, vnd dar vnder verpint ich mich sta^et ze behalten allez, daz vor geschriben stet. Der prief ist geben nach Christes gepu^erd vber dreutzehen hundert iar, dar nach in dem ains vnd fumftzkisten iar, an eritag vor dem auffart tag.

Source Fulltext: OÖUB 7 (Wien 1876) S. 247f., Nr. 242