Ich Jans von Trawn vnd mein hausfraw vro Dorothe vnd mein su^en Leupolt Jans Hertneid vnd Erasm, vnd mein tochter Kathrey vnd all vnser erben di wir haben oder noch gewinnen, wir veriehen vnuerschaidenlich vnd tu^en chunt allen den, di disen prief sehent oder horent lesen, di nu sind oder hernach chu^enftig werdent, daz vns dez no^et ist geschechen vnd durft, daz wir nach rat vnsrer besten freunt verseczt haben vnsern hof, gelegen an dem Vierstweg, da Stephan auf gesezzen ist vnd gelegen in Enser pharr, der von alter her vnser vreis aygen gewesen ist, mit alle den nuczen vnd rechten vnd dar zu^e geho^ert ze holtz ze veld vnd ze wizmat, gestift vnd vngestift, gepawn vnd vngepawn, versucht vnd vnuersucht, dem ersamm gotzhaus dacz sand Florian vnd besunderlich dem spital da selbs vmb dvew hundert phunt phenning wienner munzze, der si vns gericht vnd gewert habent gantz vnd gar liebleich vnd gu^etleich, daz wir sev nichtes zeichen, vnd sollen auch des satz ir gewer sein ze hof vnd ze taiding, swo in dez no^et geschiecht an als geuer; gescha^ech aber daz, daz vnsrer freunt theiner auf stu^end vnd wolt nach dem vorgenantem hof sprechen, daz sollen wir in aus richten vnd fu^er sev sten an aller stat, da in dez not geschiecht, di weil wir leben. Darnach ehern iemant vnsrer erben oder freunt, der pezzer recht wolt haben zu dem vorgenantem hof, der geb dem egenanten gotshaus datz sand Florian vnd dem spital da selbs drew hundert pfunt gebiger wienner pfenning an sand Jacobstag vnd ziech sich dar zu^e, all di weil dez nicht geschiecht, so sollen si den egenanten hof haben in nu^etz vnd in gewer vnd von vns vngelost ewichleich in rechter satz gewer als recht ist in O^esterreich, vnd waz si dez vorgenanten hofs niezzent, di weil vnd er nicht gelost wirt von vns oder von vnsern nachommen, daz sol vnserr vodern vnd vns sein ein ewigs selgeret. Vnd daz di wandlung vnd der satz, als vorgeschriben stet, ewichleich sta^et vnd vnuerchert beleib, dar vber gib ich disen prief ich vorgenanter Jans von Trawn mit meinem vnd mit meines swager Dyetreichs dez Aysterhaimer anhangunden jnsigeln, vnd durch pezzer sicherhait dem egenantem gotzhaus datz sand Florian vnd dem spital daselbs haben wir dienstlich gepeten den erbern herren hern Eberharten von Walse hauptman ob der Ens, daz er sein insigel dar an gelegt hat zu^e einem gezeug vnd sicherhait der vorgeschriben wandlung. Der prief ist geben nach Christ gepurd dreutzehen hundert iar, dar nach in dem ains vnd funftzikisten jar an sand Georgen tag.

Source Fulltext: OÖUB 7 (Wien 1876) S. 242f., Nr. 237